ബിലാലിക്കയെ വീണ്ടും കാണാൻ കട്ട കാത്തിരിപ്പെന്ന് പൃഥ്വിരാജ്..

മമ്മൂട്ടിയുടെ മാസ് എന്റര്‍ടൈനര്‍ ബിഗ് ബിയുടെ രണ്ടാം ഭാഗം വരുന്നതായി അമല്‍ നീരദ് കഴിഞ്ഞ ദിവസം പ്രഖ്യാപിച്ചിരുന്നു. ഇതിന് പിന്നാലെ മമ്മൂട്ടി ഫാൻസും സിനിമാതാരങ്ങളും ഈ വാർത്ത സോഷ്യൽ മീഡിയയിൽ ഒരു ആഘോഷമാക്കി.

ബിലാല്‍ ജോണ്‍ കുരിശിങ്കല്‍ വീണ്ടുമെത്തുന്നതിന്റെ ത്രില്ലിലാണ് പൃഥ്വിരാജ് ഉൾപ്പെടെയുള്ള മലയാള സിനിമയിലെ ഒട്ടുമിക്ക താരങ്ങളും. ദുല്‍ഖര്‍ സല്‍മാന്‍, ആസിഫ് അലി, കുഞ്ചാക്കോ ബോബന്‍, നിവിന്‍ പോളി, ഉണ്ണി മുകുന്ദന്‍, അജു വര്‍ഗീസ്, ശ്രീനാഥ് ഭാസി, സുരാജ് വെഞ്ഞാറമൂട്, നസ്രിയ, റിമ കല്ലിങ്കല്‍, ആഷിക് അബു തുടങ്ങി നിരവധി താരങ്ങൾ തങ്ങളുടെ സന്തോഷവും ആകാംഷയും ഫേസ്ബുക്ക് പോസ്റ്റുകളിലൂടെ പങ്കുവെച്ചിരുന്നു.

സംവിധായകന്റെ ഫാൻബോയ് ആണെന്നും അതിലുപരി മമ്മൂട്ടിയുടെയും ബിലാലിന്റേം ആരാധകനാണെന്നും ഫേസ്ബുക്കിൽ കുറിച്ചുകൊണ്ടാണ് പൃഥ്വിരാജ് ഈ വാർത്തയെ സ്വീകരിച്ചത്.’ബിലാലിനെ കാണാൻ കാത്തിരിക്കുന്നു ‘

‘കൊച്ചി പഴയ കൊച്ചിയല്ലെന്ന് അറിയാം, പക്ഷെ ബിലാല്‍ പഴയ ബിലാല്‍ തന്നെയാ’ എന്ന് ഒരുതവണ പോലും പറയാത്ത സിനിമാപ്രേമികൾ ചുരുക്കമാണ്. ഗൗരവം നിറഞ്ഞ പരുക്കന്‍ സ്വഭാവവും കുറിക്ക് കൊള്ളുന്ന സംസാരവും വ്യത്യസ്തമായ അവതരണശൈലിയും പ്രേക്ഷകർക്ക് അത്ര കണ്ട് ബോധിച്ചില്ലെങ്കിലും പിന്നീട് ബിലാൽ ജോൺ കുരിശിങ്കൽ എന്ന കഥാപാത്രത്തെ ആരാധകർ ആവേശപൂർവം ഏറ്റെടുത്തു.

ബിഗ് ബി എന്ന ബിഗ് ബ്രദറിനെ മലയാളത്തിന് സമ്മാനിച്ച അമല്‍ നീരദ് തന്നെയാണ് ബിലാലിന്റെ രണ്ടാം വരവും ഒരുക്കുന്നത്. അതുകൊണ്ടുതന്നെ ബിലാല്‍ വീണ്ടും വരുമ്പോള്‍ പ്രേക്ഷകര്‍ക്ക് പ്രതീക്ഷകള്‍ ഏറെയാണ്. അതേസമയം ചിത്രത്തിലെ മറ്റ് താരങ്ങളെക്കുറിച്ചോ അണിയറപ്രവർത്തകരെക്കുറിച്ചോ കൂടുതൽ വിവരങ്ങൾ പുറത്തുവിട്ടിട്ടില്ല.