അതെ വാർത്തകൾ സത്യം, ബിഗ് ബിയ്ക്ക് രണ്ടാം ഭാഗം വരുന്നു

മലയാള സിനിമയിൽ വന്ന ഏറ്റവും സ്റ്റൈലിഷ് സിനിമ ഏതെന്ന് ചോദിച്ചാൽ മലയാളികൾ ഒരു സംശയം കൂടാതെ ബിഗ് ബി എന്ന് പറയും. ബോളിവുഡ് ചിത്രം ഫോർ ബ്രദേഴ്‌സിന്റെ റീമേക്ക് ആണെങ്കിലും ഡയലോഗുകൾ കൊണ്ടും മേക്കിങ് സ്റ്റൈൽ കൊണ്ടും ബിഗ് ബി മലയാള സിനിമയ്ക്ക് ഒരു പുത്തൻ അനുഭവം തന്നെയായിരുന്നു.

ഉണ്ണി ആറിന്റെ സംഭാഷണങ്ങളും അമൽ നീരദിന്റെ മേക്കിങ് രീതികളും ഇന്നും സിനിമ ആസ്വാദകർക്ക് പ്രിയപ്പെട്ടത് ആണ്. ബിഗ് ബിയിലെ “കൊച്ചി പഴയ കൊച്ചി അല്ലെന്ന് അറിയാം” എന്ന ഡയലോഗ് ഒരു തവണയെങ്കിലും പറയാത്ത മലയാളികൾ കുറവാണെന്ന് തന്നെ പറയാം.

2007ൽ ആണ് മെഗാസ്റ്റാറിനെ നായകനാക്കി അമൽ നീരദ് ബിഗ് ബി തിയേറ്ററുകളിൽ എത്തിച്ചത്. എന്നാൽ തിയേറ്ററുകളിൽ വലിയ ചലനങ്ങൾ സൃഷ്ടിക്കാൻ ബിഗ് ബിയ്ക്ക് കഴിഞ്ഞില്ല. അതുവരെ കണ്ടില്ലാത്ത മേക്കിങ് സ്റ്റൈൽ ആരാധകർക്ക് അന്ന് സ്വീകരിക്കാൻ കഴിഞ്ഞില്ല. എന്നാൽ പിന്നീട് മലയാള സിനിമ മാറിയപ്പോൾ ബിഗ് ബി കൾട് ക്ലാസിക്ക് ആയി ആരാധകക്കിടയിൽ സ്ഥാനം നേടി.

ബിഗ് ബിയുടെ രണ്ടാം ഭാഗം വർഷങ്ങളായി പറഞ്ഞു കേൾക്കുന്ന ഒന്നായിരുന്നു. ഇന്ന് സംവിധായകൻ അമൽ നീരദ് തന്നെ തന്റെ ഫേസ്ബുക്ക് പേജിലൂടെ ബിഗ് ബിയുടെ രണ്ടാം ഭാഗം വരുന്നെന്ന് പ്രഖ്യാപിച്ചു. ബിലാൽ എന്നാണ് ചിത്രത്തിന്റെ പേര്. 2018ൽ ചിത്രം തിയേറ്ററുകളിൽ എത്തും.