കയ്യടി നേടി അമ്മിണിപ്പിള്ളയുടെ നാടൻ അടി; സൂപ്പർ വിജയം നേടി ഒരു തെക്കൻ തല്ല് കേസ്

ബിജു മേനോനെ നായകനാക്കി നവാഗതനായ ശ്രീജിത്ത് എൻ സംവിധാനം ചെയ്ത ഒരു തെക്കൻ തല്ല് കേസ് ഈ കഴിഞ്ഞ വ്യാഴാഴ്ചയാണ് ഓണം റിലീസായി പുറത്തു വന്നത്. ജി ആർ ഇന്ദുഗോപന്‍റെ അമ്മിണിപ്പിള്ള വെട്ടുകേസ് എന്ന കഥയെ ആസ്പദമാക്കിയുള്ള ഈ ചിത്രത്തിന് തിരക്കഥ രചിച്ചത് രാജേഷ് പിന്നാടനാണ്. ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും, ന്യൂ സൂര്യ ഫിലിംസിന്റെ ബാനറിൽ സുനിൽ എ കെയും ചേർന്ന് നിർമ്മിച്ച ഈ ചിത്രം ഇവിടെ വിതരണം ചെയ്തതും ന്യൂ സൂര്യ ഫിലിംസാണ്. ആദ്യ ഷോ മുതൽ തന്നെ മികച്ച പ്രേക്ഷക പ്രതികരണം നേടിയ ഈ ചിത്രം ഇപ്പോൾ സൂപ്പർ വിജയമാണ് നേടുന്നത്. ഹാസ്യത്തിനും ആക്ഷനും പ്രാധാന്യം നൽകിയ ഈ ചിത്രത്തിന്റെ ഹൈലൈറ്റ് ബിജു മേനോന്റെ പ്രകടനം തന്നെയാണ്. അമ്മിണിപ്പിള്ള എന്ന കഥാപാത്രമായി അദ്ദേഹം നടത്തിയ പ്രകടനം വലിയ പ്രശംസയാണ് നേടുന്നത്.

ഹാസ്യത്തിനും ആക്ഷനുമൊപ്പം തന്നെ പ്രണയത്തിനും വൈകാരിക മുഹൂർത്തങ്ങൾക്കും ചിത്രത്തിൽ സ്ഥാനമുണ്ട്. എൺപതുകളിൽ നടക്കുന്ന കഥയാണ് ഈ ചിത്രം പറയുന്നത്. ഏതായാലും പ്രേക്ഷകരെ ആദ്യാവസാനം രസിപ്പിക്കുന്ന ഈ ചിത്രം എല്ലാത്തരം പ്രേക്ഷകരെയും തീയേറ്ററുകളിലേക്കു ആകർഷിക്കുന്നുണ്ട് എന്നാണ് തീയേറ്റർ കാഴ്ചകൾ സൂചിപ്പിക്കുന്നത്. കുടുംബ പ്രേക്ഷകർ ഇരു കയ്യും നീട്ടി സ്വീകരിച്ചത് തന്നെ ഈ ചിത്രം നേടുന്ന വിജയത്തിന്റെ തെളിവാണ്. ബിജു മേനോനെ കൂടാതെ പദ്മപ്രിയ, റോഷൻ മാത്യു, നിമിഷാ സജയൻ, അഖിൽ കവലയൂർ, അശ്വത് ലാൽ, റിജു ശിവദാസ്, അരുൺ പാവുമ്പ, അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്യുതാന്ദൻ, ശശി വാളൂരാൻ, നീരജ രാജേന്ദ്രൻ, ജയരാജ് എന്നിവരും ഇതിന്റെ താരനിരയിലുണ്ട്.