ബിജിത് ബാല എന്ന സംവിധായകൻ നിങ്ങളെ ഞെട്ടിക്കും; പടച്ചോനെ ഇങ്ങള് കാത്തോളിക്ക് ആശംസകളുമായി നടൻ മാധവൻ

ബിജിത് ബാല സംവിധാനം ചെയ്ത ഏറ്റവും പുതിയ ചിത്രമായ പടച്ചോനെ ഇങ്ങള് കാത്തോളീ ഇന്ന് പ്രേക്ഷകരുടെ മുന്നിലെത്തുകയാണ്. ശ്രീനാഥ് ഭാസി നായകനായി എത്തുന്ന ഈ ചിത്രം ആഗോള റിലീസായി ആണ് എത്തുന്നത്. ഇപ്പോൾ ഈ ചിത്രത്തിന് എല്ലാവിധ വിജയാശംസകളും നേർന്ന് കൊണ്ട് മുന്നോട്ടു വന്നിരിക്കുന്നത് പ്രശസ്ത തെന്നിന്ത്യൻ താരവും സംവിധായകനുമായ മാധവനാണ്. ബിജിത് ബാല തന്റെ അടുത്ത സുഹൃത്താണെന്നും അദ്ദേഹത്തിന്റെ സംവിധാനത്തിലൊരുങ്ങിയ പടച്ചോനെ ഇങ്ങള് കാത്തോളീ എന്ന ഈ ചിത്രം കാണാൻ താനും കാത്തിരിക്കുകയാണെന്നും മാധവൻ പറയുന്നു. താൻ സംവിധാനം ചെയ്ത റോക്കട്രി ദി നമ്പി എഫ്ഫക്റ്റ് എന്ന ചിത്രത്തിന്റെ എഡിറ്റർ ആയിരുന്നു ബിജിത് ബാലയെന്നും, ആ ചിത്രം ഏറ്റവും മികച്ചതാവാനുള്ള കാരണങ്ങളിലൊന്ന് ബിജിത് എന്ന എഡിറ്ററുടെ മികവ് കൂടിയാണെന്നും മാധവൻ പറഞ്ഞു.

ബിജിത് ബാല എന്ന സംവിധായകൻ പ്രേക്ഷകരെ ഞെട്ടിക്കുമെന്ന് തനിക്ക് ഉറപ്പുണ്ടെന്നും, കാരണം ബിജിത്തിന്റെ കഴിവും സിനിമാ കാഴ്ചപ്പാടും തന്നെ അത്ഭുതപ്പെടുത്തിയിട്ടുണ്ടെന്നും മാധവൻ കൂട്ടിച്ചേർത്തു. ഏതായാലും ഇന്ന് പുറത്ത് വരുന്ന ഈ ചിത്രം ഏറെ പ്രതീക്ഷകളോടെയാണ് മലയാളി പ്രേക്ഷകരും കാത്തിരിക്കുന്നത്. ഇതിന്റെ ടീസറുകൾ, ട്രൈലെർ, ഇതിലെ ഗാനങ്ങൾ എന്നിവ സൂപ്പർ ഹിറ്റായി മാറിയിരുന്നു. ആക്ഷേപ ഹാസ്യത്തിന് പ്രാധാന്യം നൽകിയാണ് ഈ ചിത്രം ഒരുക്കിയിരിക്കുന്നതെന്ന് ഇതിന്റെ ടീസർ, ട്രൈലെർ എന്നിവ സൂചിപ്പിക്കുന്നുണ്ട്. ആൻ ശീതൾ നായികാ വേഷം ചെയ്ത ഈ ചിത്രം രചിച്ചത് പ്രദീപ് കുമാർ കാവുംതറയും, ഈ ചിത്രം നിർമ്മിച്ചത് ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ജോസ്കുട്ടി മഠത്തിൽ, രഞ്ജിത്ത് മണംബ്രക്കാട്ട്‌ എന്നിവർ ചേർന്നുമാണ്.