യു എസ് എ യിലും ബിഗിൽ ആഘോഷം; ഹാട്രിക്ക് നേടി ദളപതി വിജയ്..!

ദളപതി വിജയ് എന്ന തമിഴ് സൂപ്പർ താരം ബോക്സ് ഓഫീസിലെ ഒരേ ഒരു രാജാവാണ് താൻ എന്ന് ഒരിക്കൽ കൂടി അടിവരയിട്ടു തെളിയിക്കുകയാണ്. തമിഴ്‌നാട്ടിൽ മാത്രമല്ല, റസ്റ്റ് ഓഫ് ഇന്ത്യ മാർക്കറ്റിലും ഓവർസീസ് മാർക്കറ്റിലും എല്ലാം ഗംഭീര പ്രകടനമാണ് വിജയ്‌യുടെ പുതിയ ചിത്രമായ ബിഗിൽ കാഴ്ച വെക്കുന്നത്. ഇതിനോടകം അദ്ദേഹത്തിന്റെ കരിയറിലെ ഏറ്റവും വലിയ വിജയങ്ങളിൽ ഒന്നായ ഈ ചിത്രം ഇരുനൂറു കോടി ക്ലബിലും ഇടം പിടിച്ചു എന്ന് സ്ഥിതീകരിക്കാത്ത റിപ്പോർട്ടുകൾ വരുന്നുണ്ട്. എന്നാൽ ഉറപ്പിച്ചു പറയാൻ കഴിയുന്ന ഒരു കാര്യം ഓവർസീസ് മാർക്കറ്റിൽ ഈ ചിത്രം നേടുന്ന ഞെട്ടിക്കുന്ന കളക്ഷൻ ആണ്. ആദ്യ വീക്കെൻഡിൽ നിന്ന് മാത്രം വിദേശ മാർക്കറ്റിൽ നിന്ന് അമ്പതു കോടിക്ക് മുകളിൽ നേടിയ ബിഗിൽ ഇപ്പോഴും അവിടെ കുതിപ്പ് തുടരുകയാണ്.

യു എസ് എ യിൽ വൺ മില്യൺ മാർക്ക് ബോക്സ് ഓഫീസിൽ പിന്നിട്ടു കഴിഞ്ഞു ബിഗിൽ. ഇതോടു കൂടി തുടർച്ചയായി മൂന്നാമത്തെ വിജയ് ചിത്രമാണ് അമേരിക്കയിൽ ഈ നേട്ടം കൈവരിക്കുന്നത്. ആറ്റ്ലി തന്നെ ഒരുക്കിയ മെർസൽ, എ ആർ മുരുഗദോസ് ഒരുക്കിയ സർക്കാർ എന്നിവയാണ് ഇതിനു മുന്നേ ഈ നേട്ടം സ്വന്തമാക്കിയ വിജയ് ചിത്രങ്ങളിൽ രണ്ടെണ്ണം. ഫ്രാൻ‌സിൽ ഈ വർഷം ഏറ്റവും കൂടുതൽ ആളുകൾ കണ്ട തമിഴ് സിനിമ എന്ന റെക്കോർഡ് സ്വന്തമാക്കിയ ബിഗിൽ ഓസ്ട്രേലിയ, മലേഷ്യ, സിംഗപ്പൂർ, ന്യൂസീലൻഡ്, യു എ ഇ / ജി സി സി മാർക്കറ്റ് എന്നിവിടങ്ങളിലും ഗംഭീര തുടക്കമാണ് നേടിയത്. ഈജിപ്റ്റിലും ഈ ചിത്രം റിലീസ് ചെയ്യാൻ പോവുകയാണ് എന്ന വിവരവും വരുന്നുണ്ട്.