ഭാസ്കരഭരണം ജൂൺ 26 ന് തിയറ്ററുകളിൽ

രൂപേഷ് പീതാംബരൻ സംവിധാനം ചെയ്ത് പ്രധാന വേഷത്തിലെത്തുന്ന ഭാസ്കരഭരണം ജൂൺ 26 ന് തിയറ്ററുകളിലെത്തും. അടുത്തിടെ പുറത്തിറങ്ങിയ ചിത്രത്തിന്റെ ടീസർ സോഷ്യൽ മീഡിയയിൽ ശ്രദ്ധ നേടുകയാണ്. വിനീത് ശ്രീനിവാസൻ തന്റെ സോഷ്യൽ മീഡിയ പേജിലൂടെയാണ് ടീസർ റിലീസ് ചെയ്തത്.

അമ്മയും മകനും വീട്ടുജോലിക്കാരനും ചേർന്ന് അച്ഛനെ കൊല്ലാൻ പദ്ധതിയിടുന്ന രസകരമായ സംഭവങ്ങളാണ് ടീസറിന്റെ പ്രധാന ആകർഷണം. ഡാർക്ക് കോമഡി ശൈലിയിൽ ഒരുക്കിയിരിക്കുന്ന ചിത്രം മലയാള സിനിമയിൽ വ്യത്യസ്തമായ അനുഭവമാകുമെന്നാണ് പ്രേക്ഷകരുടെ വിലയിരുത്തൽ.

സ്ഫടികം ചിത്രത്തിലൂടെ ബാലതാരമായി ശ്രദ്ധ നേടിയ രൂപേഷ് പീതാംബരൻ, തീവ്രം, യു ടൂ ബ്രൂട്ടസ് എന്നീ ചിത്രങ്ങൾക്ക് ശേഷം ഒരുക്കുന്ന മൂന്നാമത്തെ സംവിധാന സംരംഭമാണിത്. അച്ഛനെ “നന്നാക്കാൻ” ശ്രമിക്കുന്ന ഒരു മകന്റെ കഥയാണ് ചിത്രം പറയുന്നത്.

സോണിക മീനാക്ഷി, അജയ് പവിത്രൻ, മിഥുൻ എം. ദാസ്, പാർവ്വതി കളരിക്കൽ എന്നിവരാണ് മറ്റ് പ്രധാന താരങ്ങൾ. നികാഫും ഗുഡ് ഫെല്ലാസ് ഇൻ ഫിലിംസും ചേർന്നാണ് ചിത്രം നിർമ്മിക്കുന്നത്. പനോരമ മ്യൂസിക്കാണ് ചിത്രത്തിന്റെ ഓഡിയോ റൈറ്റ്സ് സ്വന്തമാക്കിയിരിക്കുന്നത്.

പി ആർ ഓ ; ഐശ്വര്യ രാജ്