മമ്മൂട്ടിയുടെ ‘മാമാങ്ക’ത്തിനൊപ്പം ബാഹുബലി ടീമും; ഒരുങ്ങുന്നത് മെഗാസ്റ്റാറിന്റെ കരിയറിലെ ഏറ്റവും മികച്ച ചിത്രം

സിനിമാപ്രേമികൾ പ്രതീക്ഷയോടെ കാത്തിരിക്കുന്ന ഒരു ചിത്രമാണ് മമ്മൂട്ടി നായകനായെത്തുന്ന ‘മാമാങ്കം’. ചരിത്ര സിനിമകളെ മികച്ച അഭിനയ മുഹൂർത്തങ്ങളിലൂടെ മലയാളികൾക്ക് സമ്മാനിച്ച മമ്മൂട്ടി വീണ്ടും ഒരു പീരീഡ് സിനിമയിൽ അഭിനയിക്കുന്നു എന്നതാണ് ചിത്രത്തിന്റെ പ്രത്യേകത. മാമാങ്കത്തിന് ദൃശ്യവിരുന്ന് സമ്മാനിക്കുന്നത് ബാഹുബലി 2ന് വി.എഫ്.എക്സ് ഒരുക്കിയ കമലകണ്ണൻ ആണെന്നാണ് ഇപ്പോൾ പുറത്തുവരുന്ന റിപ്പോർട്ടുകൾ. മാമാങ്കത്തിന്റെ ആദ്യ ഷെഡ്യൂൾ ഫെബ്രുവരി അവസാനമോ മാർച്ച് ആദ്യമോ തുടങ്ങുമെന്നാണ് സൂചന.

12 വർഷത്തെ ഗവേഷണത്തിനു ശേഷം സഞ്ജീവ് പിള്ള സംവിധാനം ചെയ്യുന്ന മാമാങ്കത്തിത്തിൽ ഒരു യോദ്ധാവിന്‍റെ വേഷത്തിലാണ് മമ്മൂട്ടി എത്തുന്നത്. തിരുന്നാവായ മണപ്പുറത്ത് വ്യാഴവട്ടത്തിലൊരിക്കല്‍ മാഘ മാസത്തിലെ വെളുത്ത വാവില്‍ നടത്തി വരുന്ന മാമാങ്കം പ്രമേയമാക്കിയാണ് ചിത്രം ഒരുക്കുന്നത്. മമ്മൂട്ടിയോടൊപ്പം യോദ്ധാക്കളായ നാലു കഥാപാത്രങ്ങൾക്കും ഏറെ പ്രാധാന്യമുണ്ട്. എഴുപതോളം ഉപ കഥാപാത്രങ്ങളുമുണ്ട്. കളരി അടിസ്ഥാനമാക്കിയുള്ള ആയോധനമുറകൾ ചിത്രത്തിലുടനീളമുണ്ട്.

താന്‍ ഇതുവരെ അഭിനയിച്ചതില്‍ ഏറ്റവും വലിയ സിനിമയാണ് മാമാങ്കമെന്ന് മമ്മൂട്ടി മുൻപ് വ്യക്തമാക്കിയിരുന്നു. ചിത്രത്തിനായി മമ്മൂട്ടി കളരി അഭ്യസിക്കുന്നുണ്ടെന്നും വാർത്തകൾ വന്നിരുന്നു. അന്താരാഷ്ട്ര തലത്തിലുള്ള പ്രശസ്തരായ സാങ്കേതിക വിദഗ്ധരാണ് മാമാങ്കത്തിനൊപ്പം സഹകരിക്കുന്നത്.
കാവ്യ ഫിലിംസിന്റെ ബാനറില്‍ വേണു കുന്നപ്പിള്ളിയാണ് ചിത്രം നിർമ്മിക്കുന്നത്. മമ്മൂട്ടിയുടെ കരിയറിലെ തന്നെ മികച്ച ചിത്രങ്ങളിലൊന്നായി മാമാങ്കം മാറുമെന്നുള്ള പ്രതീക്ഷയിലാണ് ആരാധകർ.