ഒമർ ലുലുവിന് നന്ദി പറഞ്ഞ് ഓസ്‌ട്രേലിയൻ ക്രിക്കറ്റ് ഇതിഹാസം മൈക്കൽ ബെവൻ..!

ഏകദിന ക്രിക്കറ്റിന്റെ ചരിത്രത്തിലെ ഇതിഹാസങ്ങളിൽ ഒരാളാണ് ഓസ്‌ട്രേലിയൻ ക്രിക്കറ്റ് താരമായ മൈക്കൽ ബെവൻ. ക്രിക്കറ്റ് ചരിത്രത്തിലെ തന്നെ ഏറ്റവും മികച്ച ഫിനിഷർമാരിൽ ഒരാളാണ് മൈക്കൽ ബെവൻ. തൊണ്ണൂറുകളിലും രണ്ടായിരത്തിന്റെ ആദ്യ പകുതിയിലും ആണ് മൈക്കൽ ബെവൻ അന്താരാഷ്ട്ര ക്രിക്കറ്റിൽ നിറഞ്ഞു നിന്നത്. ഇപ്പോഴിതാ പ്രശസ്ത മലയാള സിനിമാ സംവിധായകൻ ഒമർ ലുലുവിന് നന്ദി പറഞ്ഞു കൊണ്ട് രംഗത്തു വന്നിരിക്കുകയാണ് മൈക്കൽ ബെവൻ. റൈസ് ഓഫ് എ ഫിനിഷിങ് കിംഗ്‌ എന്ന പേരിൽ ഒമർ ലുലു തന്റെ ഫേസ്ബുക്ക് അക്കൗണ്ടിൽ പോസ്റ്റ് ചെയ്ത മൈക്കൽ ബെവൻ ട്രിബ്യൂട്ട് ലേഖനത്തിന് ആണ് താരം നന്ദി അറിയിച്ചത്. വളരെ മനോഹരമായ ഈ ആദരവിന് നന്ദി എന്നു ഒമർ ലുലുവിന് മെസേജ് അയച്ച മൈക്കൽ ബെവൻ, ഒമർ ലുലുവിന്റെ ഫേസ്ബുക്ക് പോസ്റ്റ് ഷെയർ ചെയ്യുകയും ചെയ്തു.

ഷിയാസ് എന്ന വ്യക്തിയാണ് ഈ ലേഖനം എഴുതിയിരിക്കുന്നത്. സിഡ്‌നിയിൽ മൈക്കൽ ബെവന്റെ സമാനതകൾ ഇല്ലാത്ത വീരേതിഹാസം എന്ന വാക്കുകളോടെ തുടങ്ങുന്ന ഈ ലേഖനം കൃത്യം 2 വ്യാഴവട്ടം മുമ്പ് അദ്ദേഹം ക്രിക്കറ്റ് ഫീൽഡിൽ നടത്തിയ ഒരു പോരാട്ടത്തിന്റെ ദീർഘമായതും സമ്പൂർണമായതുമായ വിവരണമാണ് നമ്മുക്ക് നൽകുന്നത്. 1996 ലെ ബെൻസൺ ആൻഡ് ഹെഡ്ജസ് സീരീസിൽ നടന്ന ആസ്‌ട്രേലിയയും വെസ്റ്റ് ഇൻഡീസും കളിയിലെ ബെവന്റെ മാസ്മരിക പ്രകടനമാണ് ഈ പോസ്റ്റിന് ആധാരം. 43 ഓവറിൽ 172 റൺസ് എന്ന ലക്ഷ്യം പിൻതുടരവേ, വിന്ഡീസിന്റെ കരുത്തുറ്റ ബൗളിംഗ് നിരക്ക് മുന്നിൽ തകർന്ന ഓസീസ് ബാറ്റിംഗ് നിരയെ 38 റൺസിന് ആറു വിക്കറ്റ് എന്ന നിലയിൽ നിന്നും വിജയത്തിൽ എത്തിച്ച ബെവന്റെ കഥ ഏതൊരു ക്രിക്കറ്റ് പ്രേമിയെയും രോമാഞ്ചം കൊള്ളിക്കും എന്നത് തീർച്ച. 88 പന്തിൽ 78 റൺസ് ആണ് അന്ന് മൈക്കൽ ബെവൻ പുറത്താവാതെ അടിച്ചെടുത്തത്.