മോഹൻലാലിനും മമ്മൂട്ടിക്കുമൊപ്പം ആസിഫ് അലി; ഒരുങ്ങുന്നത് ബ്രഹ്മാണ്ഡ ചിത്രം

മെഗാസ്റ്റാർ മമ്മൂട്ടിയെ നായകനാക്കി മഹേഷ് നാരായണൻ ഒരുക്കാൻ പോകുന്ന ചിത്രത്തിൽ മലയാളത്തിലെ മറ്റൊരു മെഗാതാരമായ മോഹൻലാൽ അതിഥി വേഷം ചെയ്യുന്നു എന്ന വാർത്തകൾ ആരാധകരെ ആവേശം കൊള്ളിച്ചിരുന്നു. നവംബറിൽ ചിത്രീകരണം ആരംഭിക്കാൻ പോകുന്ന ഈ ചിത്രത്തിൽ മോഹൻലാൽ അടുത്ത വർഷം ജനുവരി അവസാനമോ ഫെബ്രുവരി ആദ്യമോ ആവും ജോയിൻ ചെയ്യുക എന്ന വാർത്തയും വന്നിരുന്നു. ഇപ്പോഴിതാ ഈ ചിത്രത്തിന്റെ താരനിരയിൽ വന്ന ഒരു മാറ്റത്തെ കുറിച്ചുള്ള സൂചനയാണ് ലഭിക്കുന്നത്.

മമ്മൂട്ടി, മോഹൻലാൽ എന്നിവർക്കൊപ്പം ഫഹദ് ഫാസിൽ, കുഞ്ചാക്കോ ബോബൻ എന്നിവരും ഈ ചിത്രത്തിൽ നിർണ്ണായക വേഷങ്ങൾ ചെയ്യുമെന്ന് വാർത്തകൾ വന്നിരുന്നു. ഏറ്റവും പുതിയ വിവരങ്ങൾ പ്രകാരം ഡേറ്റ് ഇഷ്യൂ കാരണം ഫഹദ് ഫാസിൽ ഈ ചിത്രത്തിൽ നിന്നും പിന്മാറി എന്നും, അതിന് പകരമായി യുവതാരം ആസിഫ് അലി ഇതിന്റെ താരനിരയിലേക്കു എത്തിയെന്നുമാണ് അറിയാൻ സാധിക്കുന്നത്. മോഹൻലാൽ, മമ്മൂട്ടി എന്നിവർക്കൊപ്പം ഒരുമിച്ച് ഒരു ചിത്രത്തിൽ വേഷമിടാനുള്ള ഭാഗ്യമാണ് ഇപ്പോൾ ആസിഫിനെ തേടിയെത്തിയിരിക്കുന്നത്.

ഈ വാർത്തയുടെ ഔദ്യോഗിക സ്ഥിരീകരണം വന്നിട്ടില്ലെങ്കിലും ആസിഫ് അലി ആരാധകരും സിനിമാ പ്രേമികളും ആവേശത്തിലാണ്. കേരളം, ശ്രീലങ്ക, ഡൽഹി, ലണ്ടൻ എന്നിവിടങ്ങളിലായി ചിത്രീകരിക്കാൻ പോകുന്ന ഈ ബ്രഹ്മാണ്ഡ ചിത്രം, മമ്മൂട്ടിയുടെ കരിയറിലെ തന്നെ ഏറ്റവും വലിയ ചിത്രമായിരിക്കും. എൺപത് കോടിയോളമാണ് ഇതിന്റെ ബഡ്ജറ്റ് എന്ന് വാർത്തകളുണ്ട്. കിഷ്കിന്ധാ കാണ്ഡത്തിന്റെ സൂപ്പർ വിജയത്തിന് ശേഷം രോഹിത് വി എസ ഒരുക്കുന്ന ടികി ടാക്കയിലാണ് ആസിഫ് അഭിനയിക്കാൻ പോകുന്നത്.