ബിടെക്കിന് ശേഷം മൃദുൽ നായർ-ആസിഫ് അലി ടീം വീണ്ടും; കാസർഗോൾഡ് ആരംഭിച്ചു

ഹിറ്റ് ചിതമായ ബിടെക്കിന് ശേഷം ആസിഫ് അലി- മൃദുൽ നായർ ടീം വീണ്ടും ഒന്നിക്കുകയാണ്. ആസിഫ് അലി, സണ്ണി വെയ്ൻ, ഷൈൻ ടോം ചാക്കോ, ദീപക് പറമ്പോൾ, മാളവിക ശ്രീനാഥ്, ശ്രീരഞ്ജിനി നായർ എന്നിവരെ പ്രധാന കഥാപാത്രങ്ങളാക്കി മൃദുൽ നായർ തിരക്കഥയെഴുതി സംവിധാനം ചെയ്യുന്ന ഏറ്റവും പുതിയ ചിത്രമാണ് കാസർഗോൾഡ്. ഈ ചിത്രത്തിന്റെ ചിത്രീകരണം ഇപ്പോൾ പയ്യന്നൂരിൽ ആരംഭിച്ചുക്കഴിഞ്ഞു. പൂജ ചടങ്ങുകളോടെ ആരംഭിച്ച ഈ ചിത്രത്തിന്, മധുസൂദനൻ എം എൽ എ സ്വിച്ചോൺ കർമ്മം നിർവ്വഹിച്ചപ്പോൾ സൂപ്പർ ഹിറ്റ് സംവിധായകൻ രതീഷ് ബാലകൃഷ്ണ പൊതുവാൾ ആണ് ആദ്യ ക്ലാപ്പടിച്ചത്. ഇവരെ കൂടാതെ എം വിജിൻ എം എൽ എ, മുൻ എം എൽ എ ആയ ടി പി രാജേഷ്, പ്രശസ്ത സംവിധായകൻ പ്രിയനന്ദനൻ എന്നിവരും ചിത്രത്തിന്റെ പൂജ ചടങ്ങിൽ പങ്കെടുത്തു. മുഖരി എന്റർടൈയ്മെന്റ്, സരിഗമ എന്നീ ബാനറുകളിൽ സൂരജ് കുമാർ,റിന്നി ദിവാകർ എന്നിവർ ചേർന്നാണ് ഈ ചിത്രം നിർമ്മിക്കുന്നത്.

ജെബിൻ ജേക്കബ് ഛായാഗ്രഹണം നിർവ്വഹിക്കുന്ന ഈ ചിത്രത്തിലെ ഗാനങ്ങൾക്ക് വിനായക് ശശികുമാർ, വൈശാഖ് സുഗുണൻ എന്നിവർ വരികൾ രചിച്ചിരിക്കുന്നു. ഡോൺ വിൻസെന്റ, നിരഞ്ജ് സുരേഷ് എന്നിവരാണ് ഈ ചിത്രത്തിന് വേണ്ടി സംഗീത സംവിധാനം നിർവഹിക്കുന്നത്. മനോജ് കണ്ണോത്ത് എഡിറ്റിംഗ് നിർവഹിക്കുന്ന ഈ ചിത്രത്തിന്റെ കലാസംവിധാനം ചെയ്യുന്നത് സജി ജോസഫ്, വസ്ത്രാലങ്കാരം മഷർ ഹംസ എന്നിവരാണ്. ക്യാംപസ് പശ്ചാത്തലത്തിൽ കഥ പറഞ്ഞ മൃദുൽ നായരുടെ ബിടെക് എന്ന ആദ്യ ചിത്രം മികച്ച പ്രേക്ഷക- നിരൂപക പ്രശംസയാണ് നേടിയത്. അത്കൊണ്ട് തന്നെ വീണ്ടും അതേ ടീമൊന്നിക്കുന്ന കാസർഗോൾഡ്‌ വലിയ പ്രതീക്ഷയാണ് പ്രേക്ഷകർക്ക് സമ്മാനിക്കുന്നത്.