നിപ്പ ആക്രമണത്തെ ആസ്പദമാക്കി വമ്പൻ താരനിരയിൽ ആഷിഖ് അബു ചിത്രം വൈറസ്; ആസിഫ് അലി-ടോവിനോ ടീം വീണ്ടും..!

മായാനദിക്ക് ശേഷം പ്രശസ്ത സംവിധായകൻ ആഷിഖ് അബു ഒരു വമ്പൻ ചിത്രവുമായി എത്തുകയാണ്. വമ്പൻ താര നിര അണിനിരക്കുന്ന ഈ ചിത്രം കേരളത്തിൽ ഉണ്ടായ നിപ്പ വൈറസ് ആക്രമണത്തിന്റെ പശ്ചാത്തലത്തിൽ ആണ് കഥ പറയുന്നത്. വൈറസ് എന്ന് പേരിട്ടിരിക്കുന്ന ഈ ചിത്രം അടുത്ത വർഷം സമ്മർ വെക്കേഷൻ സമയത്തു റിലീസ് ചെയ്യാൻ ആണ് നീക്കം. ആസിഫ് അലി, ടോവിനോ തോമസ്, സൗബിൻ ഷാഹിർ, ചെമ്പൻ വിനോദ് , ദിലീഷ് പോത്തൻ, കാളിദാസ് ജയറാം, രേവതി, പാർവതി, റിമ കല്ലിങ്ങൽ, രമ്യ നമ്പീശൻ, എന്നിവർ പ്രധാന വേഷങ്ങളിൽ എത്തുന്ന ഈ ചിത്രം രചിക്കുന്നത് സംവിധായകനും രചയിതാവുമായ മുഹ്‌സിൻ പരാരിയും, അമൽ നീരദ്- ഫഹദ് ഫാസിൽ ചിത്രമായ വരത്തൻ രചിച്ച സുഹാസ്- ഷറഫു ടീമും ചേർന്നാണ്.

ഈ ചിത്രത്തിന്റെ സാങ്കേതിക വിഭാഗവും വളരെ വലുതാണ്. രാജീവ് രവി ഛായാഗ്രഹണം നിർവഹിക്കുന്ന ഈ ചിത്രത്തിന് സംഗീതം നൽകുന്നത് സുഷിൻ ശ്യാം ആണ്. സൈജു ശ്രീധരൻ ആണ് ഈ ചിത്രം എഡിറ്റ് ചെയ്യാൻ പോകുന്നത്. ആഷിഖ് അബുവിന്റെ സ്വന്തം ബാനർ ആയ ഒപിഎം തന്നെയാണ് ഈ ചിത്രവും നിർമ്മിക്കുന്നത്. ആസിഫ് അലി – ടോവിനോ തോമസ് ടീം യു റ്റു ബ്രൂട്ടസ് എന്ന രൂപേഷ് പീതാംബരൻ ചിത്രത്തിന് ശേഷം വീണ്ടും ഒന്നിക്കുന്ന ചിത്രമായിരിക്കും വൈറസ്. ഈ വർഷം അവസാനത്തോടെ ചിത്രീകരണം ആരംഭിക്കാൻ പാകത്തിന് വൈറസിന്റെ പ്രീ-പ്രൊഡക്ഷൻ ജോലികൾ പുരോഗമിക്കുകയാണ്. ചിത്രത്തിന്റെ ടൈറ്റിൽ പോസ്റ്ററും ഇപ്പോൾ പുറത്തു വിട്ടിട്ടുണ്ട്. കോഴിക്കോട് കേന്ദ്രീകരിച്ചു ഉണ്ടായ നിപ്പ വൈറസ് ആക്രമണത്തിന്റെ നേർക്കാഴ്ച കാണിച്ചു തരുന്ന ഒരു ചിത്രമായിരിക്കും വൈറസ് എന്നാണ് സൂചന.