ആവേശമായി മരക്കാറിലെ രണ്ടാം കാരക്റ്റർ പോസ്റ്റർ; ആക്ഷൻ കിംഗ്‌ അർജുന്റെ ലുക്ക് ഇതാ

മോഹൻലാൽ നായകനായ മരക്കാർ എന്ന ബ്രഹ്മാണ്ഡ ചിത്രമാണ് ഇപ്പോൾ സോഷ്യൽ മീഡിയയിൽ മുഴുവൻ ചർച്ചാ വിഷയം എന്ന് പറഞ്ഞാൽ അതൊട്ടും അതിശയോക്തിയാവില്ല. കാരണം കഴിഞ്ഞ രണ്ടു ദിവസങ്ങളിലായി വന്ന ഒരു കാരക്ടർ പോസ്റ്ററും ഒരു ഒഫീഷ്യൽ മൂവി പോസ്റ്ററും ഇപ്പോഴും സോഷ്യൽ മീഡിയയിൽ നിറഞ്ഞു നിൽക്കുകയാണ്. രണ്ടു ദിവസം മുൻപേ വന്നത് ഈ ചിത്രത്തിൽ കീർത്തി സുരേഷ് അവതരിപ്പിക്കുന്ന ആർച്ച എന്ന കഥാപാത്രത്തിന്റെ കാരക്ടർ പോസ്റ്റർ ആണെങ്കിൽ ഇന്നലെ വന്നത് ഈ ചിത്രത്തിന്റെ ത്രസിപ്പിക്കുന്ന രണ്ടാം ഒഫീഷ്യൽ പോസ്റ്റർ ആണ്. പുതുവർഷത്തിൽ റിലീസ് ചെയ്ത ഇതിന്റെ ഫസ്റ്റ് ലുക്ക് പോസ്റ്ററും ഗംഭീരമായിരുന്നു. ഇപ്പോഴിതാ ഇന്ന് ഈ ചിത്രത്തിലെ രണ്ടാം കാരക്ടർ പോസ്റ്റർ റിലീസ് ചെയ്തിരിക്കുകയാണ്.

തമിഴ് നടൻ അർജുൻ ഈ ചിത്രത്തിൽ അവതരിപ്പിക്കുന്ന കഥാപാത്രത്തെ പരിചയപ്പെടുത്തിക്കൊണ്ടുള്ള കാരക്ടർ പോസ്റ്റർ ആണ് ഇന്ന് റിലീസ് ചെയ്തിരിക്കുന്നത്. ഒരു യോദ്ധാവായി ഈ ചിത്രത്തിൽ എത്തുന്ന അർജുൻ അവതരിപ്പിക്കുന്ന കഥാപാത്രത്തിന്റെ പേര് ആനന്ദൻ എന്നാണ്. മോഹൻലാൽ, അർജുൻ, കീർത്തി സുരേഷ് എന്നിവരെ കൂടാതെ വമ്പൻ താര നിര അണിനിരക്കുന്ന ഈ ചിത്രം രചിച്ചത് പ്രിയദർശനും അനി ഐ വി ശശിയും ചേർന്നാണ്. പ്രിയദർശൻ സംവിധാനം ചെയ്ത ഈ ചിത്രം മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രം കൂടിയാണ്. സാബു സിറിൽ പ്രൊജക്റ്റ് ഡിസൈനർ ആയി എത്തിയ ഈ ചിത്രത്തിന്റെ ക്യാമറ ചലിപ്പിച്ചത് തിരുവും ഗാനങ്ങൾ ഒരുക്കിയത് റോണി റാഫേലുമാണ്. ഈ ചിത്രത്തിന് വേണ്ടി പശ്ചാത്തല സംഗീതമൊരുക്കിയത് രാഹുൽ രാജ്, അങ്കിത് സൂരി, ലൈൽ ഇവാൻസ് റോഡർ എന്നിവർ ചേർന്നാണ്.