മമ്മൂട്ടി ചിത്രത്തിന് വേണ്ടി അറിസ്റ്റോ സുരേഷ് വീണ്ടും പാടുന്നു

കേരളക്കരയാകെ ഏറ്റുപാടിയ ‘ മുത്തേ പൊന്നേ ‘ എന്ന ഗാനത്തിലൂടെ മലയാളികൾക്ക് സുപരിചിതനായ അറിസ്റ്റോ സുരേഷ് വീണ്ടും പാടുന്നു. മമ്മൂട്ടി നായകനാകുന്ന പരോളിന് വേണ്ടിയാണ് അരിസ്റ്റോ ഇത്തവണ പാടുന്നത് നിവിൻ പോളി ചിത്രം ആക്ഷൻ ഹീറോ ബിജുവിലെ മുത്തേ പൊന്നേ എന്ന് തുടങ്ങുന്ന ഗാനം വമ്പൻ ഹിറ്റായിരുന്നു.

ആക്ഷൻ ഹീറോ ബിജുവിൽ സുരേഷ് അഭിനയിച്ച കള്ളുകുടിയന്റെ വേഷവും ഈ പാട്ടും ഏറെ കയ്യടിയാണ് തീയേറ്ററിൽ നിന്നും ഏറ്റുവാങ്ങിയത്. മെഗാസ്റ്റാർ മമ്മൂട്ടി നായകൻ ആവുന്ന പരോളിൽ ഇപ്പോൾ മറ്റൊരു ഗാനവുമായി എത്തുകയാണ് അറിസ്റ്റോ സുരേഷ്.

‘പരോള്‍ കാലം നല്ലൊരു പരോള്‍ കാലം, ഇരുമ്പഴിക്കൂടിനും കിടിലൻ മതിലിനും മത്താപ്പു വിരിയണ ചേലളിയാ ‘ എന്ന് തുടങ്ങുന്ന ഗാനമാണ് സുരേഷ് ചിത്രത്തിന് വേണ്ടി ആലപിചിട്ടുള്ളത്.

മതിലുകൾ , മുന്നറിയിപ്പ് തുടങ്ങിയ ചിത്രങ്ങൾക്ക് ശേഷം മമ്മൂട്ടി ജയിൽ പുള്ളിയായി എത്തുന്ന ‘പരോളിൽ’ ഏറെ നാളായി തടവിൽ കഴിയുന്ന ഒരു തടവുകാരന് പരോൾ ലഭിക്കുമ്പോഴുണ്ടാകുന്ന സന്തോഷം സഹതടവുകാർ പങ്കുവെക്കുന്നതാണ് ഗാനത്തിന്റെ രംഗങ്ങൾ.

മമ്മൂട്ടിയുടെ കഥാപാത്രത്തിനൊപ്പം ജയിലിൽ കഴിയുന്ന സഹതടവുകാരനായാണ് സുരേഷ്‌ ഈ ചിത്രത്തിൽ അഭിനയിക്കുന്നത്. ശരത് ആണ് ചിത്രത്തിന്റെ സംഗീതം നിർവഹിച്ചിരിക്കുന്നത്