നൂറിലധികം തീയേറ്ററുകളുമായി അരവിന്ദന്റെ അതിഥികൾ മുപ്പതാം ദിവസത്തിലേക്ക്…

വിനീത് ശ്രീനിവാസനെയും, ശ്രീനിവാസനെയും നായകന്മാരാക്കി എം. മോഹനൻ സംവിധാനം ചെയ്ത ചിത്രമാണ് അരവിന്ദന്റെ അതിഥികൾ. മകന്റെ അച്ഛൻ എന്ന ചിത്രത്തിന്റെ വലിയ വിജയത്തിന് ശേഷം അച്ഛനും മകനും ഒന്നിച്ചെത്തി എന്ന പ്രത്യേകത കൂടി ഉള്ള ചിത്രമാണ് അരവിന്ദന്റെ അതിഥികൾ. ചിത്രത്തിൽ അരവിന്ദനായി വിനീത് ശ്രീനിവാസൻ എത്തുമ്പോൾ മുകുന്ദൻ എന്ന കഥാപാത്രമായാണ് ശ്രീനിവാസൻ എത്തുന്നത്. ചിത്രത്തിൽ ഇരുവരും മൂകാംബിക ക്ഷേത്രത്തിനു അരികിൽ ഭക്തർക്കും ടൂറിസ്റ്റുകൾക്കുമുള്ള ഹോം സ്റ്റേ നടത്തി ജീവിക്കുന്നവരാണ്. ഇവരുടെ ജീവിതത്തിലേക്ക് ഗിരിജയും വരദയും എത്തുന്നതാണ് ചിത്രത്തിന്റെ പ്രധാന ഇതിവൃത്തം. ഗിരിജയായി ഉർവ്വശിയും വരദയായി നിഖില വിമലുമാണ് ചിത്രത്തിൽ എത്തുന്നത്.

കുടുംബ കഥ മനോഹരമായ രീതിയിൽ അവതരിപ്പിച്ച ചിത്രത്തിന് ആദ്യ ദിനം മുതൽ മികച്ച അഭിപ്രായമാണ് വന്നത്. ചിത്രത്തിന് ആദ്യ നാൾ മുതൽക്ക് തന്നെ വലിയ തിരക്കാണ് അനുഭവപ്പെട്ടത്. മൂന്നാം വാരത്തിൽ മറ്റ് റിലീസുകൾക്കിടയിലും ചിത്രം ഒരു തീയറ്ററിൽ നിന്നും മാറാതെയുള്ള തകർപ്പൻ പ്രകടനമാണ് കാഴ്ചവച്ചത്. ഇപ്പോഴിതാ ചിത്രം മുപ്പതാം ദിവസത്തിലേക്ക് കടക്കുമ്പോൾ ചിത്രം നൂറിലധികം തീയേറ്ററുകളിൽ നിറഞ്ഞ സദസ്സിൽ പ്രദർശനം തുടരുകയാണ്. ഈ അടുത്ത് കുടുംബ പ്രേക്ഷകർ നൽകിയ വലിയ വിജയം എന്ന് തന്നെ ചിത്രത്തെ വിലയിരുത്താം. കൊച്ചു ചിത്രത്തെ ജനങ്ങൾ ഇത്രത്തോളം വലിയ വിജയമാക്കിയതിൽ ചിത്രത്തിന്റെ അണിയറപ്രവർത്തകരും സന്തോഷത്തിലാണ്. ചിത്രത്തിന്റെ വിജയമാഘോഷിക്കാൻ നായകനായ വിനീത് ശ്രീനിവാസനും നായിക നിഖിലാ വിമലും തീയേറ്ററുകളിൽ എത്തിയിരുന്നു.