മമ്മൂട്ടിയുടെ ആ ക്ലാസിക് ഗാനത്തിന് ഓർക്കസ്ട്ര വായിച്ചത് എ ആർ റഹ്മാനും വിദ്യാസാഗറും..!

1985 ഇൽ മമ്മൂട്ടിയെ നായകനാക്കി ഭരതൻ സംവിധാനം ചെയ്ത ചിത്രമാണ് കാതോട് കാതോരം. ജോണ് പോൾ രചന നിർവഹിച്ച ആ ചിത്രം ഏറെ ശ്രദ്ധിക്കപ്പെട്ടത് പ്രധാനമായും അതിലെ സൂപ്പർ ഹിറ്റ് ഗാനങ്ങളിലൂടെയാണ്. കാതോട് കാതോരം എന്ന ഗാനവും, ദേവദൂതർ പാടി എന്ന ഗാനവും, നീ എൻ സർഗ സൗന്ദര്യമേ എന്ന ഗാനവുമെല്ലാം പ്രേക്ഷകരുടെ പ്രീയപ്പെട്ടവയായി മാറി. പ്രശസ്ത സംഗീത സംവിധായകനായ ഔസേപ്പച്ചൻ ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചത്. സംഗീത സംവിധായകനായി ഔസേപ്പച്ചൻ അരങ്ങേറ്റം കുറിച്ച ചിത്രവുമാണ് കാതോട് കാതോരം. ഒ എൻ വി കുറുപ്പ് ആണ് ആ ഗാനങ്ങൾക്ക് വരികൾ രചിച്ചത്. എന്നാൽ അതിലെ പാട്ടുകൾക്ക് ഉള്ള മറ്റൊരു പ്രത്യേകത കൂടി ഔസേപ്പച്ചൻ വെളിപ്പെടുത്തുകയാണ്.

അതിലെ ആ സൂപ്പർ ഹിറ്റ് ഗാനങ്ങൾക്കു വേണ്ടി ഓർക്കസ്ട്ര ചെയ്‌തവരുടെ കൂട്ടത്തിൽ ഉണ്ടായിരുന്ന രണ്ടു പേരാണ് പിന്നീട് ഇന്ത്യൻ സിനിമയിലെ സംഗീത മാന്ത്രികനായി മാറിയ, ഓസ്കാർ അവാർഡ് ജേതാവ് എ ആർ റഹ്‌മാനും ഒപ്പം തെന്നിന്ത്യൻ സംഗീത പ്രേമികളുടെ മനസ്സു കീഴടക്കിയ സംഗീത സംവിധായകൻ വിദ്യാ സാഗറും. കാതോട് കാതോരം റിലീസ് ചെയ്ത് വർഷങ്ങൾ കഴിഞ്ഞാണ് എ ആർ റഹ്‌മാനും വിദ്യാസാഗറും സംഗീത സംവിധായകരായി അരങ്ങേറ്റം കുറിച്ചത്. സൂപ്പർ ഹിറ്റ് മോഹൻലാൽ- സംഗീത് ശിവൻ ചിത്രമായ യോദ്ധ ആയിരുന്നു എ ആർ റഹ്മാൻ ഈണം നൽകിയ ആദ്യ മലയാള ചിത്രമെങ്കിൽ വിദ്യാ സാഗർ ഈണം പകർന്ന ആദ്യ മലയാള ചിത്രം മമ്മൂട്ടി- കമൽ കൂട്ടുകെട്ടിൽ ഒരുങ്ങിയ അഴകിയ രാവണനാണ്.