പുതിയ ചിത്രത്തിന് അനുഗ്രഹം തേടാനായി അപ്പാനി ശരത് മോഹൻലാലിനെ കാണാൻ എത്തി.

മോഹൻലാലിനെ കാണാൻ അപ്പാനി ശരത് എത്തി. തന്റെ പുതിയ ചിത്രമായ ‘കോണ്ടസ’ യുടെ ചർച്ചയ്‌ക്കായാണ് അപ്പാനി ശരത് മോഹൻലാലിനെ കാണാൻ ഒടിയന്റെ ലൊക്കേഷനിൽ എത്തിയത്. നവാഗതനായ സുദീപ് ഇ. എസ് ആണ് കൊണ്ടസയുടെ സംവിധാനം. അപ്പാനി ശരത് നായകനായി എത്തുന്ന ചിത്രത്തിന്റെ പ്രാരംഭ ഘട്ട പ്രവർത്തനങ്ങൾ നടന്നു വരികയാണ്. അതിനിടെ ആണ് ചിത്രത്തെ പറ്റി സംസാരിക്കുവാനും മോഹൻലാലിന്റെ ആശീർവാദങ്ങൾക്കുമായി ഒടിയന്റെ സെറ്റിൽ അപ്പാനി ശരത് എത്തിയത്.

ലാലേട്ടനെ ഒരിക്കൽ കൂടി കാണാനും അനുഗ്രഹവും ആശംസയും നേടാൻ കഴിഞ്ഞതും വലിയ ഭാഗ്യം ആയി കാണുന്നു എന്ന് കൂടിക്കാഴ്ചയുടെ ചിത്രങ്ങൾ പങ്കുവെച്ച് അപ്പാനി ശരത് പറയുകയുണ്ടായി. കഴിഞ്ഞ വർഷം പുറത്തിറങ്ങിയ അങ്കമാലി ഡയറീസ് എന്ന ചിത്രത്തിലൂടെ ആയിരുന്നു ശരത് മലയാള സിനിമയിലേക്ക് കടന്ന് വരുന്നത്. ഏതാണ്ട് മുഴുവൻ കഥാപാത്രങ്ങളെയും പുതുമുഖങ്ങൾ അവതരിപ്പിച്ച ചിത്രത്തിൽ അപ്പാനി രവി എന്ന വില്ലൻ കഥാപാത്രത്തെ ആണ് ശരത് അവതരിപ്പിച്ചത്. ചിത്രം വൻ വിജയം ആയതിന് ഒപ്പം അപ്പാനി രവിയും പ്രേക്ഷകർക്കിടയിൽ ഹിറ്റായി മാറി.

അങ്കമാലി ഡയറീസിന് ശേഷം സണ്ണി വെയിൻ നായകനായ പോക്കിരി സൈമൺ , കഴിഞ്ഞ വർഷം പുറത്തിറങ്ങിയ ലാൽ ജോസ് ചിത്രം വെളിപാടിന്റെ പുസ്തകത്തിലൂടെ മോഹൻലാലിനോടൊപ്പവും അപ്പാനി ശരത് മലയാളികൾക്ക് മുന്നിലെത്തിയിരുന്നു