ലാലേട്ടനെ കാണാന്‍ പോകുന്നതിന് മുന്‍പ് രണ്ട് പ്രാവശ്യം കുളിച്ചു : അപ്പാനി രവി

അങ്കമാലി ഡയറീസിലെ അപ്പാനി രവി എന്ന കഥാപാത്രത്തെ അവതരിപ്പിച്ച ശരത് കുമാറിനെ തേടി ഒട്ടേറെ സിനിമകളാണ് വന്നു കൊണ്ടിരിക്കുന്നത്. മോഹന്‍ലാലിനെ നായകനാക്കി ലാല്‍ ജോസ് സംവിധാനം ചെയ്യുന്ന വെളിപാടിന്‍റെ പുസ്തകമാണ് ശരത് കുമാറിന്‍റെ റിലീസിങ്ങിന് ഒരുങ്ങുന്ന ചിത്രം.

വെളിപാടിന്‍റെ പുസ്തകത്തെ കുറിച്ചും മോഹന്‍ലാലിനൊപ്പം അഭിനയിച്ചതിനെ കുറിച്ചും ശരത് കുമാര്‍ മനോരമയ്ക്ക് നല്‍കിയ ഇന്‍റര്‍വ്യൂയില്‍ പറഞ്ഞത് ഇങ്ങനെയായിരുന്നു.

“ലാലേട്ടന്‍റെ വലിയൊരു ആരാധകനാണ് ഞാന്‍. ജീവിതത്തില്‍ എപ്പോഴെങ്കിലും നേരിട്ടു കാണണമെന്ന്‍ ആഗ്രഹിച്ച അദ്ദേഹത്തിന്‍റെ കൂടെ മുഴുനീള വേഷം ചെയ്യാന്‍ കഴിഞ്ഞത് സ്വപ്നം പോലെ തോന്നുന്നു.”

“ലാലേട്ടനൊപ്പം അഭിനയിക്കുന്നതിന്‍റെ തലേദിവസം ഭയങ്കര ടെന്‍ഷന്‍ ആയിരുന്നു. അദ്ദേഹത്തെ കാണാന്‍ പോകുന്നതിന് മുന്‍പ് രണ്ടു പ്രാവശ്യം കുളിച്ചു. അത് എന്തിനാണ് എന്ന്‍ അറിയില്ല. ഒരു പ്രത്യേക ആരാധനയാണ് ലാലേട്ടനോട്”

ആഗസ്റ്റ് 31ന് ഓണം റിലീസായാണ് വെളിപാടിന്റെ പുസ്തകം തിയേറ്ററില്‍ എത്തുന്നത്. മോഹന്‍ലാലിനെ നായകനാക്കി സൂപ്പര്‍ ഹിറ്റ് സംവിധായകന്‍ ലാല്‍ ജോസ് ഒരുക്കുന്ന ആദ്യ ചിത്രമായതിനാല്‍ ഏറെ പ്രതീക്ഷകളാണ് ചിത്രത്തെ കുറിച്ച്.