ആ സിനിമ തന്റെ ഭാഗ്യം; തന്റെ ഭാഗ്യ നായകനാരെന്ന് തുറന്നു പറഞ്ഞ് അനു സിതാര..

ഒട്ടേറെ ചിത്രങ്ങളിലെ നായികാ വേഷങ്ങളിലൂടെ മലയാള സിനിമയിൽ സ്വന്തമായ ഒരു സ്ഥാനം കണ്ടെത്തിയ നടി ആണ് അനു സിതാര. ഇപ്പോൾ വലിയ ചിത്രങ്ങളുടെയും ഭാഗമായ അനു സിതാര ഒട്ടു മിക്ക മലയാള നായക നടന്മാരുടെയും നായികാ വേഷത്തിൽ അഭിനയിച്ചു കഴിഞ്ഞു. അഭിനയ മികവും സൗന്ദര്യവും കൊണ്ട് പ്രേക്ഷകരുടെ സ്നേഹം നേടിയെടുത്ത ഈ നടി പറയുന്നത് മറ്റു പല നായികമാരേയും പോലെ തന്റെ ഭാഗ്യ നായകനും ചാക്കോച്ചൻ ആണെന്നാണ്. രഞ്ജിത് ശങ്കർ സംവിധാനം ചെയ്ത രാമന്റെ ഏദൻ തോട്ടം എന്ന ചിത്രത്തിൽ ആണ് അനു സിതാര കുഞ്ചാക്കോ ബോബന്റെ നായികാ വേഷത്തിൽ എത്തിയത്. പ്രേക്ഷകരും നിരൂപകരും ഒരുപോലെ പ്രശംസ ചൊരിഞ്ഞ ആ ചിത്രത്തിൽ മാലിനി എന്ന യുവതിയുടെ വേഷത്തിൽ ആണ് അനു സിതാര അഭിനയിച്ചത്.

അനു സിതാരയുടെ അഭിനയ ജീവിതത്തിലെ വഴിത്തിരിവായ കഥാപാത്രം ആയിരുന്നു രാമന്റെ ഏദൻ തോട്ടത്തിലെ മാലിനി. ആ സിനിമ തന്റെ ഭാഗ്യം ആണെന്നും അതുകൊണ്ടു തന്നെ പുതിയ നടിമാരുടെ ഭാഗ്യ നായകൻ ആയ ചാക്കോച്ചൻ തന്നെയാണ് തന്റേയും ഭാഗ്യ നായകൻ എന്ന് പറയാം എന്നും അനു സിതാര പറയുന്നു. ഇപ്പോൾ ജനപ്രിയ നായകൻ ദിലീപിന്റെ നായികയായി അഭിനയിച്ച ശുഭരാത്രി മികച്ച പ്രേക്ഷക പ്രതികരണം നേടി മുന്നേറുന്നതിന്റെ സന്തോഷത്തിൽ ആണ് അനു സിതാര. മമ്മൂട്ടി നായകനായ മാമാങ്കം എന്ന വമ്പൻ ചിത്രത്തിലെ നായികാ വേഷവും ചെയ്തത് അനു സിതാര ആണ്. മാമാങ്കം ഈ വർഷം ഒക്ടോബറിൽ റിലീസ് ചെയ്യും.