വീണ്ടും അടിയുടെ പെരുന്നാൾ; ആർ ഡി എക്സ് ആരംഭിച്ചു

മലയാളി പ്രേക്ഷകരുടെ പ്രീയപ്പെട്ട യുവതാരങ്ങളായ ആന്റണി വർഗീസ്, ഷെയ്ൻ നിഗം, നീരജ് മാധവ് എന്നിവരെ കേന്ദ്ര കഥാപാത്രങ്ങളാക്കി നവാഗതനായ നിഹാസ് ഹിദായത് ഒരുക്കുന്ന ആർ ഡി എക്സ് ഇന്നലെ മുതൽ ചിത്രീകരണം ആരംഭിച്ചു. ഈ വിവരം പങ്ക് വെച്ചു കൊണ്ട് ഇന്നലെ അണിയറ പ്രവർത്തകർ പുറത്ത് വിട്ട മോഷൻ പോസ്റ്റർ ഇപ്പോൾ സോഷ്യൽ മീഡിയയിൽ സൂപ്പർ ഹിറ്റാണ്. മൂന്ന് കേന്ദ്ര കഥാപാത്രങ്ങളുടെ പേരുകളുടെ ചുരുക്കെഴുത്താണ് ഈ ചിത്രത്തിന്റെ ടൈറ്റിൽ. റോബര്‍ട്ട്, ഡോണി, സോവ്യര്‍ എന്നിങ്ങനെയാണ് ഇതിലെ ടൈറ്റിൽ കഥാപാത്രങ്ങളുടെ പേരുകൾ. അടി തുടങ്ങട്ടെ എന്ന ടാഗ് ലൈനോടെയാണ് ഈ ചിത്രം എത്തുന്നത് തന്നെ. ആദ്യാവസാനം കിടിലൻ ആക്ഷൻ രംഗങ്ങൾ നിറഞ്ഞ ഒരു പക്കാ മാസ്സ് എന്റെർറ്റൈനെർ ആയിരിക്കും ഈ ചിത്രമെന്ന സൂചനയാണ് ലഭിക്കുന്നത്. വീക്കെന്‍ഡ് ബ്ലോക്ക്ബസ്റ്റേഴ്സിന്‍റെ ബാനറില്‍ സോഫിയ പോള്‍ ആണ് ഈ ബിഗ് ബഡ്ജറ്റ് ചിത്രം നിർമ്മിക്കുന്നത്.

ഷബാസ് റഷീദ്, ആദർശ് സുകുമാരൻ എന്നിവർ തിരക്കഥ രചിച്ച ഈ ചിത്രത്തിൽ ഐമ റോസ്മിയും മഹിമാ നമ്പ്യാരുമാണ് നായികാ വേഷങ്ങൾ ചെയ്യുന്നത്. മനു മഞ്ജിത്തിന്റെ വരികൾക്ക് സാം സി എസ് ഈണം പകരുന്ന ഈ ചിത്രത്തിൽ പ്രശസ്ത നടൻ ലാലും ഒരു പ്രധാന വേഷം ചെയ്യുന്നുണ്ട്. ബിഗ് ബഡ്ജറ്റ് തെന്നിന്ത്യൻ ചിത്രങ്ങളുടെ ആക്ഷൻ കോറിയോഗ്രാഫറായ അൻപറിവാണ് ഈ ചിത്രത്തിലെ ആക്ഷൻ രംഗങ്ങൾ ഒരുക്കുന്നത് എന്നതാണ് ഇതിന്റെ മറ്റൊരു ഹൈലൈറ്റ്. അലക്സ് ജെ പുളിക്കൽ ക്യാമറ ചലിപ്പിക്കുന്ന ഈ ചിത്രത്തിന്റെ കഥ ഒരുക്കിയത് സംവിധായകൻ നിഹാസ് തന്നെയാണ്.