ബറോസ്, എമ്പുരാൻ, റാം ഷൂട്ടിംഗ് വിവരങ്ങൾ പുറത്തു വിട്ടു ആന്റണി പെരുമ്പാവൂർ; ദൃശ്യം 2 ആരും ചിന്തിക്കാത്ത കഥ..!

മലയാളത്തിന്റെ സൂപ്പർ താരമായ മോഹൻലാൽ ലോക്ക് ഡൗണിനു ശേഷം അഭിനയിക്കാൻ പോകുന്ന ചിത്രങ്ങളുടെ കൂടുതൽ വിവരങ്ങൾ വെളിപ്പെടുത്തി മുന്നോട്ടു വന്നിരിക്കുകയാണ് നിർമ്മാതാവായ ആന്റണി പെരുമ്പാവൂർ. മോഹൻലാൽ ഉടൻ അഭിനയിക്കാൻ പോകുന്നത് ആന്റണി പെരുമ്പാവൂർ നിർമ്മിച്ച് ജീത്തു ജോസഫ് സംവിധാനം ചെയ്യാൻ പോകുന്ന ദൃശ്യം 2 എന്ന ചിത്രത്തിലാണ്. മലയാളത്തിലെ വിസ്മയ വിജയമായ ദൃശ്യത്തിന്റെ ഈ രണ്ടാം ഭാഗത്തിന് ആരും ചിന്തിക്കാത്ത ഒരു കഥയാണ് സംവിധായകൻ ഒരുക്കിയിരിക്കുന്നതെന്നും, അതുകൊണ്ട് തന്നെയാണ് ഇതിന് ഒരു രണ്ടാം ഭാഗമൊരുക്കാൻ ധൈര്യപൂർവം മുന്നോട്ടു വന്നതെന്നും ആന്റണി പെരുമ്പാവൂർ പറയുന്നു. സെപ്റ്റംബർ പതിനാലിന് ആണ് ദൃശ്യം 2 ഷൂട്ടിംഗ് ആരംഭിക്കുക. അതിനു ശേഷം ആശീർവാദ് സിനിമാസ് തന്നെ നിർമ്മിക്കുന്ന രണ്ട് മോഹൻലാൽ ചിത്രങ്ങൾ കൂടി അണിയറയിൽ ഒരുങ്ങുകയാണ്. പൃഥ്വിരാജ് സംവിധാനം ചെയ്യുന്ന ലൂസിഫറിന്റെ രണ്ടാം ഭാഗമായ എമ്പുരാൻ ഒരുപാട് വൈകാതെ തന്നെ ആരംഭിക്കും എന്നും അതിന്റെ കഥ, താര നിർണ്ണയം തുടങ്ങിയ കാര്യങ്ങളിൽ ഏകദേശം തീരുമാനം ആയെന്നും അദ്ദേഹം പറഞ്ഞു.

അതുപോലെ മോഹൻലാൽ ആദ്യമായി സംവിധാനം ചെയ്യാൻ പോകുന്ന ബറോസ് എന്ന ത്രീഡി ഫാന്റസി ചിത്രവും ഒരുങ്ങുകയാണ്. അതിന്റെ പ്രീ- പ്രൊഡക്ഷൻ ജോലികൾ അവസാന ഘട്ടത്തിൽ ആണെന്നും അടുത്ത വര്ഷം തന്നെ ആ ചിത്രത്തിന്റെ ഷൂട്ടിങ്ങും ഉണ്ടാകുമെന്നും ആന്റണി പെരുമ്പാവൂർ പറഞ്ഞു. ലോക്ക് ഡൌൺ വന്നപ്പോൾ പകുതി ഷൂട്ടിംഗ് കഴിഞ്ഞു നിന്ന് പോയ മോഹൻലാൽ- ജീത്തു ജോസഫ് ചിത്രമായ റാം അടുത്ത ഫെബ്രുവരിയിൽ ആരംഭിക്കാൻ ആണ് പ്ലാൻ എന്നും ഇനിയുള്ള ഭാഗങ്ങൾ ബ്രിട്ടനിൽ ചിത്രീകരിക്കാനുള്ളത് കൊണ്ടാണ് ഇപ്പോഴത്തെ സാഹചര്യത്തിൽ ഷൂട്ടിംഗ് വൈകുന്നത് എന്നും അദ്ദേഹം അറിയിച്ചു. ഇത് കൂടാതെ ഒട്ടേറെ ചിത്രങ്ങൾ മോഹൻലാലിന്റെ നായകനാക്കി അണിയറയിൽ ഒരുങ്ങുകയാണ്.