വാക്ക് പാലിച്ചു ആന്റണി പെരുമ്പാവൂർ; ലൂസിഫെറിലെ ഡ്രാക്കുള പള്ളിക്കു ശാപമോക്ഷം..!

മലയാള സിനിമ കണ്ട എക്കാലത്തേയും ഏറ്റവും വലിയ വിജയം ആയി മോഹൻലാൽ ചിത്രമായ ലൂസിഫർ മാറിയിരുന്നു. മുരളി ഗോപിയുടെ രചനയിൽ പൃഥ്വിരാജ് സുകുമാരൻ സംവിധാനം ചെയ്ത ഈ ചിത്രത്തിന്റെ നിർമ്മാണം നിർവഹിച്ചത് മലയാള സിനിമയിലെ ഏറ്റവും വലിയ പ്രൊഡക്ഷൻ ബാനർ ആയ ആശീർവാദ് സിനിമാസ് ആണ്. മോഹൻലാൽ- ആന്റണി പെരുമ്പാവൂർ എന്നിവർ നേതൃത്വം നൽകുന്ന ഈ ബാനർ ആണ് ഇപ്പോൾ മലയാള സിനിമയിലെ എക്കാലത്തേയും വലിയ ചിത്രങ്ങൾ നിർമ്മിച്ച് കൊണ്ടിരിക്കുന്നതും. ഇപ്പോഴിതാ ലൂസിഫർ ചിത്രീകരിക്കുമ്പോൾ നൽകിയ വാക്ക് പാലിച്ചു കൊണ്ട് വാർത്തകളിൽ നിറയുകയാണ് ആന്റണി പെരുമ്പാവൂർ എന്ന നിർമ്മാതാവ്. ലൂസിഫർ കണ്ട പ്രേക്ഷകർ ഏവരും ശ്രദ്ധിച്ച ഒന്നാണ് അതിലെ ഡ്രാക്കുള പള്ളി. പൊട്ടി പൊളിഞ്ഞ ഒരു പഴയ പള്ളി ആയിരുന്നു അത്.

ഇടുക്കിയിലെ ഉപ്പുതറക്കു അടുത്ത് സ്ഥിതി ചെയ്യുന്ന ഈ പള്ളി ഏറെ കാലമായി പൊട്ടി പൊളിഞ്ഞു കിടക്കുകയായിരുന്നു. ഈ പള്ളി ഷൂട്ടിംഗ് ആവശ്യങ്ങൾക്കായി ചോദിക്കുന്ന സമയത്തു ആന്റണി പെരുമ്പാവൂർ പള്ളി അധികാരികൾക്ക് കൊടുത്ത വാക്ക് ഷൂട്ടിംഗ് തീർന്നു കഴിഞ്ഞു ഈ പള്ളി പുതുക്കി പണിതു കൊടുക്കാം എന്നതായിരുന്നു. ലൂസിഫർ മലയാള കണ്ട ഏറ്റവും വലിയ മഹാവിജയങ്ങളിൽ ഒന്നായി മാറിയപ്പോൾ ആന്റണി പെരുമ്പാവൂർ തന്റെ വാക്ക് മറന്നില്ല. എട്ടു ലക്ഷത്തോളം രൂപ ചെലവഴിച്ചു അദ്ദേഹം ഈ പള്ളി പുതുക്കി പണിതു കഴിഞ്ഞു. ഇപ്പോൾ ഏറെ ആളുകൾ ആണ് ഈ പള്ളി കാണാൻ ആയി അവിടെ എത്തിച്ചേരുന്നത്. മാത്രമല്ല അവിടെ ആരാധനയും പുനരാരംഭിച്ചു കഴിഞ്ഞു.