ഉടനെ തന്നെ ‘ദൃശ്യം 3’ സംഭവിക്കും. വെളിപ്പെടുത്തലുമായി ആന്റണി പെരുമ്പാവൂർ

ദൃശ്യം 2 പ്രതീക്ഷകളെല്ലാം വാനോളമുയർത്തികൊണ്ട് മലയാള സിനിമയിലെ മറ്റൊരു അത്ഭുത ചിത്രമായി മാറി കഴിഞ്ഞിരിക്കുന്നു. ആമസോൺ പ്രൈമിൽ റിലീസ് ചെയ്ത ചിത്രം ഇതിനോടകം ലക്ഷക്കണക്കിന് പ്രേക്ഷകരാണ് കണ്ടിട്ടുള്ളത്. ഏവരുടെയും പ്രതീക്ഷയ്ക്ക് മുകളിൽ ഉയർന്ന ചിത്രം വിവിധ ഭാഷകളിലുള്ള സെലിബ്രിറ്റികളുടെയും ലക്ഷക്കണക്കിന് വരുന്ന പ്രേക്ഷകരുടെയും പ്രശംസകൾ ഏറ്റുവാങ്ങി കൊണ്ട് ഗംഭീര വിജയത്തിലേക്ക് കുതിക്കുകയാണ്. ഈ സാഹചര്യത്തിൽ ചിത്രത്തേക്കുറിച്ച് നിർമാതാവ് ആന്റണി പെരുമ്പാവൂർ നടത്തിയ പരാമർശം ആരാധകരിൽ വലിയ ആവേശം ഉളവാക്കിരിക്കുകയാണ്. ദൃശ്യം 2 ന്റെ വിജയം ആഘോഷിക്കുന്നതിനോടൊപ്പം ദൃശ്യം 3 ഉണ്ടാകുമെന്ന സൂചന അദ്ദേഹം നൽകിയിരിക്കുകയാണ്. മനോരമയ്ക്ക് നൽകിയ അഭിമുഖത്തിലാണ് അദ്ദേഹം ദൃശ്യം 3 നെക്കുറിച്ച് വെളിപ്പെടുത്തിയത്.

ദൃശ്യം 2 ഗംഭീര വിജയമായതോടെ ഇനി ചിത്രത്തിന്റെ മൂന്നാംഭാഗം ഉണ്ടാകുമോ എന്ന ചോദ്യത്തിന് ആന്റണി പെരുമ്പാവൂർ ആവേശകരമായ മറുപടി നൽകുകയായിരുന്നു. ദൃശ്യം 3 സിനിമ ജീത്തു ജോസഫിന്റെ മനസ്സിലുണ്ടെന്നും അത് അദ്ദേഹത്തിന്റെ (ജീത്തുവിന്റെ) സംസാരത്തിൽ നിന്നും മനസ്സിലായതാണെന്നും ആന്റണി പെരുമ്പാവൂർ പറയുന്നു. അതുകൊണ്ടുതന്നെ ദൃശ്യം മൂന്ന് ഉണ്ടാകുമെന്നാണ് താൻ പ്രതീക്ഷിക്കുന്നതെന്നും മോഹൻലാലും ജീത്തു ജോസഫും അതേപറ്റി സംസാരിക്കുന്നുണ്ട് എന്നും ആന്റണി പെരുമ്പാവൂർ വെളിപ്പെടുത്തി.