ആദ്യ ചിത്രത്തിൽ തന്നെ കൈയടി നേടി സത്യൻ അന്തിക്കാടിന്റെ മകൻ അനൂപ് സത്യൻ

ഫീൽ ഗുഡ് സിനിമകളിലൂടെ കുടുംബ പ്രേക്ഷകരുടെ ഇഷ്ട സംവിധായകനായി രണ്ട് തലമുറയോളം മുന്നിട്ട് നിൽക്കുന്ന വ്യക്തിയാണ് സത്യൻ അന്തിക്കാട്. ഏതൊരു നായകനെയും ഏറ്റവും പൂർണതയിൽ ഉപയോഗിക്കുന്ന ചുരുക്കം ചില സംവിധായകരിൽ ഒരാളാണ് അദ്ദേഹം. സത്യൻ അന്തിക്കാടിന്റെ മകനായ അനൂപ് സത്യനും സംവിധാന രംഗത്തേക്ക് വന്നിരിക്കുകയാണ്. സുരേഷ് ഗോപി, ദുൽഖർ, ശോഭന, കല്യാണി പ്രിയദർശൻ എന്നിവരെ കേന്ദ്ര കഥാപാത്രങ്ങളാക്കി ഒരുക്കിയിരിക്കുന്ന ‘വരനെ ആവശ്യമുണ്ട്’ എന്ന ചിത്രത്തിലൂടെ അനൂപ് സത്യൻ തന്റെ ആദ്യ സംവിധാന സംരഭം വിജയകരമായി പൂർത്തിയാക്കിയിരിക്കുകയാണ്. എങ്ങും മികച്ച പ്രതികരണം നേടി ചിത്രം തീയറ്ററുകളിൽ നിറഞ്ഞ സദസ്സിൽ പ്രദർശനം തുടരുകയാണ്. വെയ്ഫറർ ഫിലിംസിന്റെ ബാനറിൽ ദുൽഖർ സൽമാനാണ് ചിത്രം നിർമ്മിച്ചിരിക്കുന്നത്. ആദ്യ ചിത്രത്തിലൂടെ തന്നെ അച്ഛന്റെ കഴിവുകൾ കിട്ടിയിട്ടുണ്ടന്ന് അനൂപ് സത്യൻ തെളിയിച്ചിരിക്കുകയാണ്.

ഒരു സത്യൻ അന്തിക്കാട് ചിത്രം കണ്ട പ്രതീതിയാണ് വരനെ ആവശ്യമുണ്ട് എന്ന ചിത്രം സമ്മാനിച്ചിരിക്കുന്നതെന്ന് പ്രേക്ഷകർ ഒരേ സ്വരത്തിൽ പറയുകയാണ്. സുരേഷ് ഗോപി, ശോഭന എന്നിവരുടെ വമ്പൻ തിരിച്ചുവരവിന് കൂടിയാണ് അനൂപ് സത്യൻ വഴി ഒരുക്കിയത്. 4 വർഷങ്ങൾക്ക് ശേഷമാണ് സുരേഷ് ഗോപി ഒരു മലയാള ചിത്രത്തിൽ പ്രത്യക്ഷപ്പെടുന്നത്. സുരേഷ് ഗോപി എന്ന നടൻ ആദ്യ കാലങ്ങളിൽ സത്യൻ അന്തിക്കാടിന്റെ അടുത്ത് ഒരുപാട് ചാൻസ് ചോദിച്ചിട്ടുണ്ട് അതുപോലെ പിൽക്കാലത്ത് നല്ല വേഷങ്ങളും ലഭിച്ചിട്ടുണ്ട്. ഒരുകാലത്ത് മലയാള സിനിമയിൽ മുൻനിര നായകന്മാരുടെ പട്ടികയിൽ ഉണ്ടായ നടനെ തിരിച്ചു കൊണ്ടുവരുവാൻ നിയോഗമായത് സത്യൻ അന്തിക്കാടിന്റെ മകനെയായിരുന്നു എന്നതും ഏറെ കൗതുകം ഉണർത്തുന്ന വസ്തുത തന്നെയാണ്. ആദ്യ ചിത്രത്തിലൂടെ തന്നെ നല്ല തുടക്കം ലഭിച്ച അനൂപ് സത്യൻ ഒരുപാട് നല്ല ചിത്രങ്ങൾ സമ്മാനിക്കും എന്ന പ്രതീക്ഷയിലാണ് സിനിമ പ്രേമികൾ.