‘അഞ്ചാം പാതിര’ക്ക് ശേഷം മലയാളത്തിലേക്ക് മറ്റൊരു ത്രില്ലർ കൂടി; 21 ഗ്രാംസ്‌ മാർച്ച്‌ 18 ന്‌

‘അഞ്ചാം പാതിര’യ്ക്ക് ശേഷം മലയാള സിനിമാപ്രേക്ഷകരെ ത്രില്ലടിപ്പിക്കാൻ മറ്റൊരു ഇൻവെസ്റ്റിഗേഷൻ ത്രില്ലർ എക്സ്പീരിയൻസ് നൽകാൻ പോകുന്ന ഒരു ചിത്രം കൂടി റിലീസിന് ഒരുങ്ങുന്നു. നവാഗത സംവിധായകനായ ബിബിൻ കൃഷ്ണ രചനയും സംവിധാനവും നിർവഹിക്കുന്ന ഏറ്റവും പുതിയ സസ്പെൻസ് ത്രില്ലർ ചിത്രമായ ’21 ഗ്രാംസ്’ ആണ്. അനൂപ് മേനോൻ ആണ് ഈ ചിത്രത്തിന്റെ കേന്ദ്ര കഥാപാത്രത്തെ അവതരിപ്പിക്കുന്നത്. ഒരു കൊലപാതകത്തെ തുടർന്ന് അത് അന്വേഷിക്കാൻ വരുന്ന ഉദ്യോഗസ്ഥന്റെ വേഷമാണ് അനൂപ് മേനോൻ അവതരിപ്പിക്കുന്നത്. മാർച്ച്‌ 18 ന് തീയേറ്ററുകളിൽ എത്തുന്ന ചിത്രത്തിന്റെ ട്രൈലർ ഇതിനോടകം തന്നെ സാമൂഹ്യ മാധ്യമങ്ങളിൽ ഇടം പിടിച്ചു കഴിഞ്ഞിരിക്കുന്നു.

മർഡർ മിസ്റ്ററി ഇൻവെസ്റ്റിഗേഷൻ ത്രില്ലർ ആയി ഒരുക്കിയിരിക്കുന്ന ഈ ചിത്രത്തിൽ വലിയ ഒരു താരനിര തന്നെയുണ്ട്. അനൂപ് മേനോൻ കൂടാതെ ലിയോണ ലിഷോയ്, അനു മോഹൻ, രഞ്ജി പണിക്കർ, രഞ്ജിത്, ലെന, നന്ദു, ജീവ ജോസഫ്, മാനസ രാധാകൃഷ്ണൻ, പ്രശാന്ത് അലക്സാണ്ടർ, മറീന മൈക്കിൾ, ബിനീഷ് ബാസ്റ്റിൻ തുടങ്ങിയവർ പ്രധാന വേഷങ്ങൾ അവതരിപ്പിക്കുന്നുണ്ട്.

റിനീഷ് കെ എൻ നിർമ്മാണം നിർവഹിച്ചിരിക്കുന്ന ഈ ചിത്രത്തിന് വേണ്ടി ക്യാമറ ചലിപ്പിച്ചിരിക്കുന്നത് ജിത്തു ദാമോദർ. എഡിറ്റിങ് അപ്പു എൻ ഭട്ടതിരിയും, സംഗീതം നൽകിയിരിക്കുന്നത് ദീപക് ദേവും. ഗംഭീര സസ്പെന്സും ദീപക് ദേവിന്റെ ശക്തമായ പശ്ചാത്തലസംഗീതവും നിറഞ്ഞ പ്രേക്ഷകനെ ത്രസിപ്പിക്കുന്ന രീതിയിലാണ് ട്രൈലർ ഒരുക്കിയിരിക്കുന്നത്.