പ്രണവ് മോഹൻലാലിന് ശേഷം പാർക്കർ പഠിക്കാൻ അന്ന ബെൻ; വെളിപ്പെടുത്തി താരം..!

ആദി എന്ന ജീത്തു ജോസഫ് ചിത്രത്തിലൂടെ പ്രണവ് മോഹൻലാൽ എന്ന നടൻ നായകനായി അരങ്ങേറ്റം കുറിച്ചപ്പോൾ, അതിന്റെ ബ്ലോക്ക്ബസ്റ്റർ വിജയത്തിന് കാരണമായി മാറിയ ഒരു ഘടകം പ്രണവ് മോഹൻലാൽ കാഴ്ച വെച്ച അതിഗംഭീരമായ സംഘട്ടനം ആയിരുന്നു. പാർക്കർ എന്ന സംഘട്ടന ശൈലി അഭ്യസിച്ച പ്രണവ് അതിസാഹസികമായ സംഘട്ടനങ്ങൾ ആണ് ഈ ചിത്രത്തിൽ കാഴ്ച വെച്ചത്. അതിനു ശേഷം വന്ന ചില റിപ്പോർട്ടുകൾ നമ്മളോട് പറഞ്ഞത്, പ്രണവിന് ശേഷം പ്രശസ്ത മലയാള യുവ നായികയായ അന്ന ബെന്നും പാർക്കർ അഭ്യസിക്കുകയാണ് എന്നാണ്. രഞ്ജൻ പ്രമോദ് ഒരുക്കുന്ന ഒരു ചിത്രത്തിന് വേണ്ടിയാണു അന്ന പാർക്കർ പഠിക്കുന്നത് എന്നും അതിൽ അന്നയുടെ സംഘട്ടന രംഗങ്ങൾ ഉണ്ടാകുമെന്നുമാണ് വാർത്തകൾ വന്നത്. ഇപ്പോഴിതാ ആ ചോദ്യത്തിന് മറുപടി പറയുകയാണ് അന്ന ബെൻ. ഓൺലൂകേർസ് മീഡിയയുമായി നടത്തിയ സംഭാഷണത്തിൽ ആണ് അന്ന ബെൻ മറുപടി പറഞ്ഞത്.

അങ്ങനെ ഒന്നും പറയാൻ പറ്റില്ല എന്നും താൻ മറ്റൊരു ചിത്രത്തിന് വേണ്ടി ശാരീരികമായി ഫിറ്റ്നസ് നിലനിർത്താൻ വേണ്ടി കൂടി ബോക്സിങ് പരിശീലനമാണ് നടത്തിയത് എന്നും അന്ന പറയുന്നു. ഇനി വരാൻ പോകുന്ന “എന്നിട്ട് അവസാനം” എന്ന തന്റെ പുതിയ ചിത്രത്തിൽ ഒരു സ്പോർട്സ് സംബന്ധമായ ഭാഗത്തിൽ അഭിനയിക്കണം എന്നും അതിനു ശാരീരികമായി നല്ല പരിശ്രമം ആവശ്യമാണ് എന്നുമാണ് അന്ന ബെൻ പറയുന്നത്. ഇപ്പോൾ അന്ന നായികാ വേഷം ചെയ്ത രണ്ടു ചിത്രങ്ങൾ ആണ് തീയേറ്ററുകളിൽ ഓടുന്നത്. അതിലൊന്ന് ആഷിഖ് അബു ഒരുക്കിയ നാരദൻ ആണെങ്കിൽ മറ്റൊന്ന് വൈശാഖ് ഒരുക്കിയ നൈറ്റ് ഡ്രൈവ് ആണ്. ഈ രണ്ടു ചിത്രങ്ങളിലും മികച്ച പ്രകടനമാണ് അന്ന ബെൻ കാഴ്ച വെച്ചത്.