അപകടത്തിൽ നിന്നും അത്ഭുതകരമായി രക്ഷപ്പെട്ട് ചലച്ചിത്രതാരം അനീഷ് ജി മേനോൻ..

അപകടത്തിൽ നിന്നും അത്ഭുതകരമായി രക്ഷപ്പെട്ട സന്തോഷത്തിലും അപകടത്തിന്റെ ഞെട്ടലിലുമാണ് ചലച്ചിത്രതാരം അനീഷ് ജി മേനോൻ. നിരവധി ചിത്രങ്ങളിലൂടെ സഹതാരമായി ശ്രദ്ധിക്കപ്പെട്ട അനീഷ് ജി. മേനോൻ ദൃശ്യം എന്ന ചിത്രത്തിലെ പ്രകടനത്തിലൂടെയാണ് മലയാളികൾക്ക് സുപരിചിതനായി മാറിയത്. ദൃശ്യം എന്ന ചിത്രത്തിൽ മോഹൻലാലിന്റെ ഭാര്യാ സഹോദരന്റെ കഥാപാത്രത്തെ അവതരിപ്പിച്ച അനീഷ് ശ്രദ്ധിക്കപ്പെട്ടിരുന്നു. പിന്നീട് വള്ളിയും തെറ്റി പുള്ളിയും തെറ്റി തുടങ്ങിയ ചിത്രങ്ങളിൽ ശ്രദ്ധേയമായ കഥാപാത്രത്തെ അവതരിപ്പിച്ചിരുന്നു. കഴിഞ്ഞ വർഷം പുറത്തിറങ്ങിയ കാപ്പുച്ചീനോ എന്ന ചിത്രത്തിലൂടെ നായകനായി കൂടി അരങ്ങേറി. ഒമർ ലുലു സംവിധാനം ചെയ്യുന്ന ഒരു അഡാർ ലൗ എന്നചിത്രത്തിന്റെ ചിത്രീകരണ തിരക്കിലായിരുന്നു അനീഷ് ജി മേനോൻ. തന്റെ വീട്ടിലേക്കുള്ള വഴിയിലാണ് അനീഷ് ജി മേനോൻ വലിയ അപകടത്തെ നേരിട്ടത്.

എടപ്പാൾ – ചങ്ങരംകുളം ഹൈവേയിൽ വച്ചായിരുന്നു അപകടം നടന്നത്. തന്റെ കാറിൽ യാത്രചെയ്യുകയായിരുന്ന അനീഷ് ജി മേനോന്റെ മുന്നിലേക്ക് അശ്രദ്ധയോടെ ഒരു പിക്കപ്പ് വാൻ വളവിൽ യുട്ടേണ് എടുത്തതാണ് ഈ അപകടത്തിന് കാരണമായത്. ഞാൻ മാക്സിമം ചവിട്ടി നോക്കിയെങ്കിലും വളരെ വേഗതയോടെ കൂടിയായിരുന്നു വാഹനത്തിന്റെ യാത്ര എന്നതിനാൽ തന്നെ സ്പീഡ് നിയന്ത്രിക്കാൻ ആയില്ലെന്നു അനീഷ് ജി മേനോൻ പറഞ്ഞു. വണ്ടിയിൽ എയർബാഗ് ഉള്ളതിനാലും സീറ്റ് ബെൽറ്റ് ധരിച്ചതിനാലുമാണ് താൻ തലനാരിഴക്ക് രക്ഷപ്പെട്ടത് എന്ന് അനീഷ് ജി മേനോൻ ഫേസ്ബുക്ക് കുറിപ്പിൽ പറയുകയുണ്ടായി. ദൈവാനുഗ്രഹവും വീട്ടുകാരുടെ പ്രാർത്ഥനയുമാണ് ഇത്ര വലിയ അപകടത്തിൽ നിന്ന് തന്നെ രക്ഷിച്ചത്. വാഹനം അമിതവേഗതയിൽ ഓടിക്കുന്നവരും വളരെയധികം ശ്രദ്ധിക്കണമെന്നും കഴിവതും പരമാവധി വേഗത കുറച്ച് ഓടിക്കണമെന്ന് അനീഷ് പറഞ്ഞു. അപകടത്തിൽപ്പെട്ട അനീഷിന്റെ കാറിന്റെ മുൻവശം പൂർണമായും തകർന്ന നിലയിലാണ്.