ഓണത്തിന് സ്വർണമുരുകില്ല; ക്ഷമ ചോദിച്ച്‌ അൽഫോൻസ് പുത്രൻ; പുതിയ റിലീസ് തീയതി ഉടൻ

മലയാള സിനിമാ പ്രേമികൾ ഈ ഓണം സീസണിൽ ഏറ്റവും കൂടുതൽ കാത്തിരുന്ന ചിത്രമാണ് അൽഫോൻസ് പുത്രൻ സംവിധാനം ചെയ്ത ഗോൾഡ്. അൽഫോൻസ് തന്നെ രചിക്കുകയും ചെയ്ത ഈ ചിത്രത്തിൽ പൃഥ്വിരാജ് സുകുമാരൻ- നയൻതാര ടീമാണ് പ്രധാന വേഷങ്ങൾ ചെയ്യുന്നത്. ഈ വരുന്ന സെപ്റ്റംബർ എട്ടിന് ഓണം റിലീസായി ഗോൾഡ് പ്രേക്ഷകരുടെ മുന്നിലെത്തുമെന്നാണ് പ്രഖ്യാപിച്ചിരുന്നത്. എന്നാൽ കഴിഞ്ഞ ദിവസമാണ് ഈ ചിത്രത്തിന്റെ റിലീസ് മാറ്റിയെന്ന വിവരം ഔദ്യോഗികമായി പുറത്തു വിട്ടത്. ചിത്രത്തിന്റെ ചില ജോലികൾ തീരാൻ കാലതാമസം എടുക്കുന്നത് കൊണ്ടാണ് റിലീസ് നീട്ടേണ്ടി വന്നതെന്നും, ഓണം കഴിഞ്ഞു ഒരാഴ്ചയോളം കഴിഞ്ഞതിന് ശേഷം ഗോൾഡ് പ്രേക്ഷകരുടെ മുന്നിലെത്തുമെന്നും അൽഫോൻസ് പുത്രൻ അറിയിച്ചു. പ്രേക്ഷകർ ഏറെ പ്രതീക്ഷകളോടെ കാത്തിരുന്ന ചിത്രം അവസാന നിമിഷം മാറ്റി വെക്കേണ്ടി വന്നതിലുള്ള തന്റെ വിഷമം അറിയിച്ച അൽഫോൻസ് പുത്രൻ അവരോട് ക്ഷമയും ചോദിച്ചു.

മാജിക് ഫ്രെയിംസ്, പൃഥ്വിരാജ് പ്രൊഡക്ഷൻസ് എന്നിവയുടെ ബാനറുകളിൽ ലിസ്റ്റിൻ സ്റ്റീഫൻ, സുപ്രിയ മേനോൻ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രം ഒരു കംപ്ലീറ്റ് ഫൺ ഫിലിം ആയാണ് ഒരുക്കിയിരിക്കുന്നത്. രാജേഷ് മുരുകേശൻ സംഗീത സംവിധാനവും ആനന്ദ് സി ചന്ദ്രൻ ക്യാമറയും ചലിപ്പിച്ച ഗോൾഡിന്റെ എഡിറ്റിംഗ്, സംഘട്ടന സംവിധാനം, കളർ ഗ്രേഡിംഗ് എന്നിവ നിർവ്വഹിച്ചിരിക്കുന്നത് സംവിധായകൻ അൽഫോൻസ് പുത്രൻ തന്നെയാണ്. മല്ലിക സുകുമാരൻ, അജ്മൽ അമീർ, തെസ്നി ഖാൻ, ബാബുരാജ്, ജഗദീഷ്, കൃഷ്ണ ശങ്കർ, ശബരീഷ് വർമ്മ, ഷമ്മി തിലകൻ, ശാന്തി കൃഷ്ണ, ചെമ്പൻ വിനോദ്, ലാലു അലക്സ്, പ്രേം കുമാർ, സൈജു കുറുപ്പ്, വിനയ് ഫോർട്ട്, റോഷൻ മാത്യു, ഇടവേള ബാബു, സുരേഷ് കൃഷ്ണ, ദീപ്തി സതി, അബു സലിം, അൽത്താഫ് സലിം എന്നിവരും ഇതിലെ പ്രധാന വേഷങ്ങൾ ചെയ്യുന്നു.