പേട്ടയെക്കാൾ അന്യായ ഫാൻ ബോയ്ചിത്രം ഞാൻ ലാലേട്ടനെ വെച്ച് ചെയ്യും: അൽഫോൻസ് പുത്രൻ

പ്രശസ്ത മലയാള സംവിധായകൻ അൽഫോൻസ് പുത്രൻ ഇപ്പോൾ തന്റെ അടുത്ത ചിത്രത്തിനായി സംഗീത പഠനത്തിലാണ്. നേരം, പ്രേമം എന്നീ നിവിൻ പോളി ചിത്രങ്ങൾക്ക് ശേഷം അൽഫോൻസ് പുത്രനൊരുക്കാൻ പോകുന്നത് ഒരു മ്യൂസിക്കൽ ചിത്രമാണ്. ഈ ചിത്രത്തിലെ നായകൻ ആരാണെന്നു ഇതുവരെ തീരുമാനിച്ചിട്ടില്ല എന്നാണ് അദ്ദേഹം പറയുന്നത്. ബ്ലോക്ക്ബസ്റ്ററായ പ്രേമം റിലീസ് ചെയ്തു കഴിഞ്ഞു അഞ്ചു വർഷമായിട്ടും അൽഫോൻസ് പുത്രൻ പുതിയ ചിത്രങ്ങൾ ഒന്നും ചെയ്തില്ല. അതിനിടക്ക് കാളിദാസ് ജയറാം, മോഹൻലാൽ, മമ്മൂട്ടി, അരുൺ വിജയ് എന്നിവരെയൊക്കെ വെച്ച് പ്രൊജെക്ടുകൾ ആലോചിച്ചിരുന്നു എന്നും എന്നാൽ അവയൊന്നും നടന്നില്ല എന്നും അദ്ദേഹം വെളിപ്പെടുത്തുന്നു. ഇപ്പോഴിതാ താനൊരു മോഹൻലാൽ ചിത്രത്തിന്റെ തിരക്കഥ കൂടി എഴുതിക്കൊണ്ടിരിക്കുകയാണ് എന്നാണ് അൽഫോൻസ് പുത്രൻ പറയുന്നത്. കഴിഞ്ഞ ദിവസം ദി ക്യൂ ചാനലിന് വേണ്ടി മനീഷ് നാരായണൻ നടത്തിയ അഭിമുഖത്തിലാണ് അൽഫോൻസ് പുത്രൻ ഇത് വെളിപ്പെടുത്തിയത്.

കടുത്ത രജനികാന്ത് ആരാധകനായ കാർത്തിക് സുബ്ബരാജ് പേട്ട ഒരുക്കിയത് പോലെ കടുത്ത മോഹൻലാൽ ആരാധകനായ താൻ ഒരുക്കാൻ പോകുന്നതും ഒരു ഫാൻ ബോയ് പടമായിരിക്കുമെന്നും അദ്ദേഹം പറഞ്ഞു. ലാലേട്ടന് വേണ്ടി ഒരുഗ്രൻ കഥ കണ്ടെത്തിയിട്ടുണ്ടെന്നും അതിന്റെ തിരക്കഥാ രചനയും ഒരു വശത്തു കൂടെ പുരോഗമിക്കുകയാണെന്നും അൽഫോൻസ് പുത്രൻ പറഞ്ഞു. നടക്കുമെന്ന് പ്രതീക്ഷിക്കുന്ന ഒരു പ്രൊജക്റ്റാണ് ഇതെന്നും അദ്ദേഹം പറഞ്ഞു. എന്തായാലും അടുത്ത മ്യൂസിക്കൽ ചിത്രത്തിന് ശേഷം മിക്കവാറും താനൊരുക്കുന്നതു മോഹൻലാൽ ചിത്രമായിരിക്കുമെന്ന സൂചനയാണ് അൽഫോൻസ് പുത്രൻ നൽകുന്നത്. മോഹൻലാൽ നായകനായ പ്രിയദർശൻ ചിത്രങ്ങളായ ഒപ്പം, മരക്കാർ എന്നിവയുടെ ട്രൈലെർ ഒരുക്കിയത് അൽഫോൻസ് പുത്രനാണ്.