ഉലകനായകൻ മനസ്സ് വെച്ചാൽ ആ ചിത്രം ചെയ്യാൻ ലോകം മുഴുവൻ കൂടെ നിൽക്കും; കമൽ ഹാസനോടുള്ള അൽഫോൻസ് പുത്രന്റെ അപേക്ഷ ശ്രദ്ധ നേടുന്നു

മലയാളത്തിലെ സൂപ്പർ ഹിറ്റ് സംവിധായകനായ അൽഫോൻസ് പുത്രൻ ഇപ്പോൾ തന്റെ ഏറ്റവും പുതിയ ചിത്രമായ ഗോൾഡിന്റെ പോസ്റ്റ് പ്രൊഡക്ഷൻ ജോലികളിലാണ്. നേരം, പ്രേമം എന്നീ വലിയ ഹിറ്റുകൾക്കു ശേഷം അൽഫോൻസ് ഒരുക്കുന്ന ഈ ചിത്രത്തിൽ പൃഥ്വിരാജ് സുകുമാരനാണ് നായകനായി എത്തുന്നത്. ഈ ചിത്രത്തിന്റെ ഓരോ അപ്‌ഡേറ്റിനും കാത്തിരിക്കുകയാണ് പ്രേക്ഷകർ. ഇടയ്ക്കു ഇടയ്ക്കു അൽഫോൻസ് പുത്രൻ തന്റെ ഫേസ്ബുക് പേജിലിടുന്ന പോസ്റ്റുകളിലൂടെ വലിയ ശ്രദ്ധ നേടാറുണ്ട്. പതിവ് പോലെ ഇപ്പോൾ അദ്ദേഹമിട്ട ഒരു പോസ്റ്റ് വൈറലായി മാറുകയാണ്. ഉലകനായകൻ കമൽ ഹാസനോടുള്ള ഒരഭ്യർത്ഥന പോലെയാണ് ഇത്തവണ അദ്ദേഹം ഫേസ്ബുക് പോസ്റ്റിട്ടിരിക്കുന്നത്. കമൽ ഹാസൻ വർഷങ്ങൾക്കു മുൻപ് പ്രഖ്യാപിച്ചു നടക്കാതെ പോയ മരുതനായകം എന്ന ചിത്രം എങ്ങനെയെങ്കിലും ചെയ്‌തെടുക്കണം എന്നാണ് അൽഫോൻസ് പുത്രന്റെ അഭ്യർത്ഥന.

തന്റെ ഈ ഫേസ്ബുക് പോസ്റ്റിനു മുപ്പതിനായിരം ലൈക്സ് കിട്ടിയാൽ താങ്കൾ ഈ ചിത്രം ചെയ്യുമോ എന്നും അൽഫോൻസ് പുത്രൻ ചോദിക്കുന്നുണ്ട്. സാറിന് ഇഷ്ടമുള്ള രീതിയിൽ വേണം ഈ ചിത്രം ചെയ്യാനെന്നും, പ്രശസ്തമായ ആൽക്കമിസ്റ്റ് എന്ന പുസ്തകത്തിലെ വാചകം പോലെ, ഒരു കാര്യം നമ്മൾ പൂർണ്ണമായ മനസ്സോടെ ആഗ്രഹിച്ചാൽ, അതിനു വേണ്ടി ശ്രമിച്ചാൽ, അത് നടത്തി തരാൻ ലോകം മുഴുവൻ നമ്മുക്കൊപ്പം നിൽക്കുമെന്നും അൽഫോൻസ് പറയുന്നു. കമൽ ഹാസൻ ഉലക നായകനായത് കൊണ്ട്, അദ്ദേഹം അതാഗ്രഹിച്ചാൽ ഈ ലോകം തന്നെ മനസ്സ് കൊണ്ട് അദ്ദേഹത്തിനൊപ്പം ഉണ്ടാകുമെന്നും അൽഫോൻസ് കുറിച്ചു. നേരത്തെ കമൽ ഹാസൻ ഒരു ഫിലിം സ്‌കൂള്‍ തുടങ്ങാന്‍ പ്രപഞ്ചത്തിലെ സകല ദൈവങ്ങളോടും താന്‍ പ്രാര്‍ത്ഥിക്കുകയാണെന്നും ആ സ്‌കൂളില്‍ ഭാരതി രാജാ മുതല്‍ സ്റ്റീഫന്‍ സ്പില്‍ബര്‍ഗ് വരെയുള്ളവര്‍ വന്ന് ക്ലാസ് എടുക്കട്ടെയെന്നും അദ്ദേഹം കുറിച്ചിരുന്നു.