കേരളത്തിലെ 600 ലധികം സ്‌ക്രീനുകളിൽ കാട്ടു തീയായ് പുഷ്പ 2

അല്ലു അർജുന്റെ പാൻ ഇന്ത്യൻ ബ്ലോക്കബ്സ്റ്റർ ചിത്രമായ പുഷ്പയുടെ രണ്ടാം ഭാഗം ഇന്ന് മുതൽ ആഗോള തലത്തിൽ പ്രദർശനം ആരംഭിക്കും. കേരളത്തിലെ 600 ലധികം സ്‌ക്രീനുകളിൽ ആണ് ചിത്രം പ്രദർശിപ്പിക്കുന്നത്. ഇ ഫോർ എന്റർടൈൻമെന്റ് കേരളത്തിൽ വിതരണം ചെയ്യുന്ന ചിത്രം വെളുപ്പിനെ നാല് മണി മുതൽ തന്നെ കേരളത്തിൽ പ്രദർശനം ആരംഭിക്കും. ചിത്രത്തിന്റെ കേരളാ തീയേറ്റർ ലിസ്റ്റ് ഇവിടെ ചേർക്കുന്നു.

സുകുമാർ രചിച്ചു സംവിധാനം ചെയ്യുന്ന പുഷ്പ 2 വമ്പൻ ഹൈപ്പോടെയാണ് റിലീസ് ചെയ്യുന്നത്. നവീന്‍ യെര്‍നേനിയും വൈ രവിശങ്കറും ചേർന്ന് മൈത്രി മൂവി മേക്കേഴ്സിന്റെ ബാനറിൽ നിർമ്മിച്ച ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. രശ്‌മിക മന്ദാന നായികാ വേഷം ചെയ്യുന്ന ഈ ചിത്രത്തിൽ മലയാളി താരം ഫഹദ് ഫാസിൽ, അനസൂയ ഭരദ്വാജ്, സുനിൽ, റാവു രമേശ്, ജഗപതി ബാബു, പ്രകാശ് രാജ്, അജയ് ഘോഷ് , ജഗദീഷ് പ്രതാപ് ഭണ്ഡാരി എന്നിവരും വേഷമിട്ടിരിക്കുന്നു.

അല്ലു അർജുനൊപ്പം ഫഹദ് ഫാസിലും ഉള്ളതാണ് ചിത്രത്തിന് കേരളത്തിൽ ലഭിക്കുന്ന വമ്പൻ ഹൈപ്പിന്റെ കാരണം. ആഗോള തലത്തിൽ 150 കോടിക്ക് മുകളിൽ അഡ്വാൻസ് ബുക്കിംഗ് നേടി ചരിത്രം കുറിച്ച പുഷ്പ 2 , കേരളത്തിൽ രണ്ടര കോടിക്ക് മുകളിലും അഡ്വാൻസ് ബുക്കിംഗ് കളക്ഷൻ നേടിയിരുന്നു. നവീൻ നൂലി എഡിറ്റിംഗ് നിർവഹിച്ച ഈ ചിത്രത്തിന് ദൃശ്യങ്ങളൊരുക്കിയത് മിറോസ്ലാവ് കുബ ബ്രോസിക്‌ ആണ്. ദേവി ശ്രീ പ്രസാദ് ആണ് ചിത്രത്തിന്റെ സംഗീത സംവിധായകൻ.