രക്തം ചിന്തുന്ന ആക്ഷൻ രംഗവുമായി മമ്മൂട്ടി- അഖിൽ അക്കിനേനി ചിത്രം ഏജന്റ്; റിലീസ് അപ്‌ഡേറ്റ് എത്തി

വൈ എസ് രാജശേഖര റെഡ്ഢിയുടെ ജീവിത കഥ പറഞ്ഞ യാത്ര എന്ന ചിത്രത്തിന് ശേഷം മലയാളത്തിന്റെ മെഗാസ്റ്റാർ മമ്മൂട്ടി അഭിനയിച്ച തെലുങ്ക് ചിത്രമാണ് ഏജന്റ്. തെലുങ്ക് യുവതാരം അഖിൽ അക്കിനേനി നായകനായി എത്തുന്ന ഈ ചിത്രത്തിൽ മഹാദേവ് എന്ന് പേരുള്ള ഒരു മിലിട്ടറി ഓഫീസർ ആയി നിർണ്ണായക കഥാപാത്രമായാണ് മമ്മൂട്ടി എത്തുന്നത്. സൂപ്പർ ഹിറ്റ് സംവിധായകൻ സുരേന്ദര്‍ റെഡ്ഡി രചനയും സംവിധാനവും നിര്‍വ്വഹിക്കുന്ന ഈ ചിത്രത്തിൽ നവാഗതയായ സാക്ഷി വൈദ്യ നായികാ വേഷം ചെയ്തിരിക്കുന്നു. എകെ എന്റർടൈൻമെന്റ്‌സിന്റെയും സുരേന്ദർ 2 സിനിമയുടെയും ബാനറിൽ രാമബ്രഹ്മം സുങ്കര നിർമ്മിക്കുന്ന ഈ ചിത്രത്തിന്റെ ഏറ്റവും പുതിയ അപ്‌ഡേറ്റ് ആണ് ഇപ്പോൾ വന്നിരിക്കുന്നത്. ഇതിന്റെ റിലീസ് തീയതി പുറത്ത് വിട്ടുകൊണ്ടുള്ള ടീസറാണ് വന്നിരിക്കുന്നത്. ഈ വരുന്ന ഏപ്രിൽ 28 നാണു ഏജന്റ് റിലീസ് ചെയ്യുക. ഹോളിവുഡ് ഫിലിം സീരിസായ ജേസൺ ബോണിൽ നിന്ന് പ്രചോദനം ഉൾക്കൊണ്ട് ഒരുക്കിയിരിക്കുന്ന ഈ ചിത്രം ആദ്യം സംക്രാന്തി റിലീസ് ആണ് പ്രഖ്യാപിച്ചതെങ്കിലും, സാമ്പത്തിക പ്രശ്നങ്ങളിൽ പെട്ട് ഷൂട്ടിംഗ് തീരാൻ വൈകിയതോടെ റിലീസ് പ്ലാൻ മാറ്റുകയായിരുന്നു.

ഹിപ്പോപ്പ് തമിഴൻ സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് ക്യാമറ ചലിപ്പിച്ചത് രാകുല്‍ ഹെരിയനും എഡിറ്റ് ചെയ്തിരിക്കുന്നത് നവീൻ നൂലിയുമാണ്. ഹൈദരാബാദ്, ഡൽഹി, ഹംഗറി എന്നിവിടങ്ങളിലൊക്കെയായി ഷൂട്ട് ചെയ്ത ഈ ചിത്രത്തിൽ ആക്ഷൻ രംഗങ്ങൾക്ക് വലിയ പ്രാധാന്യമാണുള്ളത്. അഖിൽ അക്കിനേനി, മമ്മൂട്ടി എന്നിവരുടെ ഫസ്റ്റ് ലുക്ക് പോസ്റ്റർ, ഇതിന്റെ ഒരു ടീസർ, ആക്ഷൻ മേക്കിങ് വീഡിയോ എന്നിവ ഇതിനോടകം പുറത്ത് വരികയും വലിയ ശ്രദ്ധ നേടുകയും ചെയ്തിരുന്നു. ഈ ചിത്രത്തിന് വേണ്ടി വമ്പൻ മേക്കോവറാണ് അഖിൽ അക്കിനേനി നടത്തിയത്.