വീണ്ടും മനസ്സ് നിറക്കാൻ ഒരു കുടുംബ ചിത്രം. സാജൻ ബേക്കറി നാളെ മുതൽ; തിയേറ്റർ ലിസ്റ്റ് ഇതാ..!

അജു വർഗീസ് നായകനായി അഭിനയിക്കുന്ന സാജൻ ബേക്കറി സിൻസ് 1962 എന്ന ചിത്രം നാളെ റിലീസ് ചെയ്യുകയാണ്. ചിത്രത്തിന്റെ തീയേറ്റർ ലിസ്റ്റ് ഇപ്പോൾ പുറത്തു വന്നിട്ടുണ്ട്. അരുൺ ചന്ദു സംവിധാനം ചെയ്യുന്ന ഈ ചിത്രത്തിൽ ലെന, ഗ്രേസ് ആന്റണി, പുതുമുഖം രഞ്ജിത മേനോന്‍, ഗണേഷ് കുമാർ എന്നിവരാണ് പ്രധാന വേഷങ്ങൾ ചെയ്യുന്നത്. ഇവർക്ക് പുറമെ ജാഫര്‍ ഇടുക്കി, രമേശ് പിഷാരടി, ജയന്‍ ചേര്‍ത്തല, സുന്ദര്‍ റാം എന്നിവരും ഒട്ടേറെ പുതുമുഖങ്ങളും ഈ ചിത്രത്തിൽ പ്രത്യക്ഷപ്പെടുന്നു. ഇതിലെ ഗാനങ്ങളും അതുപോലെ ട്രൈലെർ എന്നിവയും വലിയ രീതിയിലാണ് സോഷ്യൽ മീഡിയയുടെ ശ്രദ്ധ നേടിയെടുത്തത്. അജു വർഗീസ്, അരുൺ ചന്തു, സച്ചിന്‍ ആര്‍ ചന്ദ്രന്‍ എന്നിവര്‍ ചേർന്ന് തിരക്കഥയും സംഭാഷണവും എഴുതിയിരിക്കുന്ന ഈ ചിത്രം നിർമ്മിച്ചിരിക്കുന്നത് ധ്യാൻ ശ്രീനിവാസൻ, വിശാഖ് സുബ്രമണ്യം, അജു വർഗീസ് എന്നിവർ ചേർന്ന് ഫൺടാസ്റ്റിക് ഫിലിംസ്, എം സ്റ്റാർ സാറ്റലൈറ്റ് കമ്മ്യൂണിക്കേഷൻസ് എന്നിവയുടെ ബാനറിലാണ്.

ഗുരുപ്രസാദ് ഛായാഗ്രഹണം നിർവഹിച്ചിരിക്കുന്ന ഈ ചിത്രത്തിന് സംഗീതമൊരുക്കിയത് പ്രശാന്ത് പിള്ളൈ ആണ്. അരവിന്ദ് മന്മഥനാണ് ഈ ചിത്രം എഡിറ്റ് ചെയ്തിരിക്കുന്നത്. ഇതിനു മുൻപ് സായാഹ്‌ന വാർത്തകൾ എന്ന ചിത്രവും സംവിധാനം ചെയ്തിട്ടുള്ള ആളാണ് അരുൺ ചന്ദു. ആ ചിത്രവും റിലീസിന് തയ്യാറായി കൊണ്ടിരിക്കുകയാണ്. ലവ് ആക്ഷൻ ഡ്രാമ എന്ന നിവിൻ പോളി- ധ്യാൻ ശ്രീനിവാസൻ ചിത്രമാണ് ഫൺടാസ്റ്റിക് ഫിലിംസ് ഇതിനു മുൻപ് നിർമ്മിച്ചത്. സാജൻ ബേക്കറി സിൻസ് 1962 കൂടാതെ നാലോളം പുതിയ ചിത്രങ്ങളാണ് ഈ വർഷം ഫൺടാസ്റ്റിക് ഫിലിംസ് നിർമ്മിച്ച് പുറത്തിറക്കാൻ പോകുന്നത്. ഒരു കംപ്ലീറ്റ് ഫാമിലി എന്റെർറ്റൈനെർ ആയാണ് സാജൻ ബേക്കറി ഒരുക്കിയിരിക്കുന്നത് എന്ന് അണിയറ പ്രവർത്തകർ അവകാശപ്പെടുന്നു.