വഴിയോരത്തെ തട്ടുകടയില്‍ അജിത്തിനെ കണ്ട് അമ്പരന്ന് ആരാധകർ

തെന്നിന്ത്യന്‍ സിനിമാ പ്രേമികളുടെ പ്രിയപ്പെട്ട താരമാണ് അജിത്. വാരാണസിയിലെ ഒരു തട്ടുകടയില്‍ ഭക്ഷണം കഴിക്കാനെത്തിയ അജിത്തിന്റെ ചിത്രങ്ങളാണ് ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്. മാസ്‌കും ജാക്കറ്റുമൊക്കെ ധരിച്ചിരുന്നതുകൊണ്ട് താരത്തെ പെട്ടെന്ന് ആരും തിരിച്ചറിഞ്ഞില്ല. ഭക്ഷണം കഴിക്കാനായി മാസ്‌ക് ഊരിയപ്പോഴാണ് കടയുടെ ഉടമ അദ്ദേഹത്തെ തിരിച്ചറിഞ്ഞത്.  അദ്ദേഹത്തെ ഞങ്ങളുടെ കടയില്‍ കണ്ടപ്പോള്‍ വളരെയധികം സന്തോഷമായി. കടയിലെ ബനാറസി ചാട്ടുകളെല്ലാം ഏറെ ആസ്വദിച്ചാണ് അദ്ദേഹം കഴിച്ചത്. ടമാറ്റര്‍ ചാട്ടുകളും വിവിധതരം മധുരപലഹാരങ്ങളും കഴിച്ചു. പിറ്റേദിവസവും അദ്ദേഹം കടയിലേക്ക് എത്തി. വിഭവങ്ങള്‍ ഉണ്ടാക്കുന്നതെല്ലാം എങ്ങനെയെന്ന് ചോദിച്ചറിയുകയും അത് മൊബൈലില്‍ പകര്‍ത്തുകയും ചെയ്തുവെന്ന് ഉടമ പറയുന്നു. വലിമൈ എന്ന ചിത്രത്തിന്റെ ഷൂട്ടിങിനായാണ് താരം വാരാണസിയിലെത്തിയത്. എച്ച് വിനോദ് ആണ് ചിത്രത്തിന്റെ സംവിധാനം. ഹുമ ഖുറേഷി, കാര്‍ത്തികേയ, യോഗി ബാബു എന്നിവരാണ് ചിത്രത്തിലെ മറ്റു താരങ്ങള്‍.

വരുന്ന മെയ് ഒന്നിന് അജിത്തിന്‍റെ അന്‍പതാം പിറന്നാള്‍ ആണ്. ഈ ദിവസം ‘വലിമൈ’ റിലീസ് ചെയ്യാന്‍ നിര്‍മ്മാതാക്കള്‍ക്ക് താല്‍പര്യമുണ്ടെന്ന് നേരത്തെ റിപ്പോര്‍ട്ടുകള്‍ എത്തിയിരുന്നു. എന്നാൽ കൊവിഡ് സാഹചര്യത്തില്‍ കാര്യമായ മാറ്റമുണ്ടാവാതെ ചിത്രം റിലീസ് ചെയ്യേണ്ടെന്നാണ് തന്റെ അഭിപ്രായമെന്ന് അജിത് നിർമ്മാതാക്കളെ അറിയിച്ചത്. ‘യെന്നൈ അറിന്താലി’നു ശേഷം അജിത്ത് കുമാര്‍ വീണ്ടും പൊലീസ് വേഷത്തില്‍ എത്തുന്ന ചിത്രമാണ് വലിമൈ.

ആക്ഷന്‍ രംഗങ്ങള്‍ക്ക് ഏറെ പ്രാധാന്യമുള്ള ചിത്രത്തില്‍ ബൈക്ക് സ്റ്റണ്ട് ചിത്രീകരിക്കുന്നതിനിടെ രണ്ടുതവണ അജിത്തിന് പരുക്കേറ്റത് വാര്‍ത്തയായിരുന്നു. കോളിവുഡില്‍ എറ്റവും കൂടുതല്‍ ആരാധകരുളള സൂപ്പര്‍താരങ്ങളില്‍ ഒരാളാണ് അജിത്. നേര്‍കൊണ്ട പാര്‍വൈ എന്ന ചിത്രമാണ് നടന്റെതായി ഒടുവില്‍ തിയ്യേറ്ററുകളില്‍ എത്തിയത്. സിനിമ ഏറെ ശ്രദ്ധിക്കപ്പെട്ടിരുന്നു. ബോളിവുഡ് ചിത്രം പിങ്കിന്റെ തമിഴ് റീമേക്കായിരുന്നു നേര്‍കൊണ്ട പാര്‍വൈ.