ആക്ഷൻ ഫാന്റസിയുമായി അമ്പരപ്പിക്കാൻ ARM; തീയേറ്റർ ലിസ്റ്റ് ഇതാ

യുവതാരം ടോവിനോ തോമസിനെ നായകനാക്കി നവാഗതനായ ജിതിൻ ലാൽ സംവിധാനം ചെയ്ത അജയന്റെ രണ്ടാം മോഷണം പ്രേക്ഷകരുടെ മുന്നിലെത്തുന്നു. ചിത്രത്തിന്റെ കേരളാ തീയേറ്റർ ലിസ്റ്റ് ഇവിടെ ചേർക്കുന്നു. വമ്പൻ റിലീസാണ് ഈ ചിത്രത്തിന് കേരളത്തിൽ ലഭിച്ചിരിക്കുന്നത്. സുജിത് നമ്പ്യാർ തിരക്കഥ രചിച്ച ഈ ചിത്രം നിർമ്മിച്ചിരിക്കുന്നത് മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ്.

ടു ഡി, ത്രീഡി ഫോര്മാറ്റുകളിലായാണ് ചിത്രം പ്രേക്ഷകരുടെ മുന്നിലെത്തുക. പാൻ ഇന്ത്യൻ റിലീസായി മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ റിലീസ് ചെയ്യുന്ന ഈ ചിത്രത്തിന് വിദേശത്തും വലിയ റിലീസാണ് ലഭിച്ചിരിക്കുന്നത്. ടോവിനോ തോമസ് ട്രിപ്പിൾ റോൾ ചെയ്യുന്ന ഈ ചിത്രത്തിൽ ടോവിനോക്കൊപ്പം കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി, ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, പ്രമോദ് ഷെട്ടി, രോഹിണി എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

മൂന്ന് കാലഘട്ടങ്ങളുടെ പശ്‌ചാത്തലത്തിലാണ്‌ ഈ ചിത്രം കഥ പറയുന്നത്. ഇമോഷൻ, ആക്ഷൻ, അഡ്വെഞ്ചർ, ഫാന്റസി, മാജിക്കൽ റിയലിസം, പ്രണയം എല്ലാം ഉൾപ്പെടുന്ന ഒരു കമ്പ്ലീറ്റ് ഫെസ്റ്റിവൽ എന്റെർറ്റൈനെർ ആയാണ് ചിത്രം ഒരുക്കിയിരിക്കുന്നതെന്നാണ് അണിയറ പ്രവർത്തകർ പറയുന്നത്. ഏതായാലും പ്രേക്ഷകർ ഏറെ ആവേശത്തോടെ കാത്തിരിക്കുന്ന ഈ ബിഗ് ബഡ്ജറ്റ് ചിത്രം ഇപ്പോൾ പ്രേക്ഷകരിലേക്ക് ഓണം റിലീസായി എത്തുകയാണ്.