പുതിയ റെക്കോർഡുമായി അജയന്റെ രണ്ടാം മോഷണം; ടോവിനോയുടെ കരിയർ ബെസ്റ്റ്

ടോവിനോ തോമസിന്റെ കരിയറിലെ ഏറ്റവും മികച്ച ബോക്സ് ഓഫീസ് ഹിറ്റും ഏറ്റവും മികച്ച പെർഫോമൻസുമായി അജയന്റെ രണ്ടാം മോഷണം മുന്നേറുകയാണ്. ആദ്യ ഏഴ് ദിനം കൊണ്ട് 50 കോടി ക്ലബിൽ ഇടം പിടിച്ച ഈ ചിത്രം ഇന്ത്യയിൽ നിന്ന് മാത്രം ഒരാഴ്ച കൊണ്ട് നേടിയത് 30 കോടിയോളമാണ്. വിദേശത്തു നിന്നും 20 കോടിക്ക് മുകളിൽ ഗ്രോസ് നേടിയ ഈ ചിത്രം ടോവിനോയുടെ കരിയറിലെ ഒരു പുതിയ റെക്കോർഡ് കൂടി സൃഷ്ടിച്ചു.

അദ്ദേഹത്തിന്റെ കരിയറിൽ തന്നെ വിദേശത്ത് നിന്ന് ഏറ്റവും കൂടുതൽ ഗ്രോസ് നേടുന്ന ചിത്രമായി അജയന്റെ രണ്ടാം മോഷണം മാറി. ഏകദേശം 19 കോടിയോളം ഓവർസീസ് ഗ്രോസ് നേടിയ തല്ലുമാല ആയിരുന്നു ടോവിനോയുടെ കരിയറിലെ ഇതിനു മുൻപത്തെ ഏറ്റവും വലിയ വിദേശ ഗ്രോസർ. അദ്ദേഹത്തിന്റെ കരിയറിലെ ആദ്യത്തെ 50 കോടി ചിത്രവുമാണ് അജയന്റെ രണ്ടാം മോഷണം. 47 കോടി നേടിയ തല്ലുമാലയാണ് അവിടെയും വീണത്. ടോവിനോ തോമസിന്റെ കരിയറിലെ അൻപതാം ചിത്രമെന്ന പ്രത്യേകതയും അജയന്റെ രണ്ടാം മോഷണത്തിന് ഉണ്ട്. മൂന്നു കഥാപാത്രങ്ങൾക്കാണ് ടോവിനോ ഈ ചിത്രത്തിൽ ജീവൻ പകർന്നത്.

മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്ന് നിർമ്മിച്ച ഈ ചിത്രം രചിച്ചത് സുജിത് നമ്പ്യാർ, ഒരുക്കിയത് നവാഗതനായ ജിതിൻ ലാൽ. ടു ഡിയിലും ത്രീഡിയിലുമാണ് ചിത്രം പ്രേക്ഷകരുടെ മുന്നിലെത്തിയത്.