കൈതി ഹിന്ദി റീമേക്ക് ഒരുങ്ങുന്നു; സംവിധാനം ചെയ്യാൻ അജയ് ദേവ്ഗണ്‍

തമിഴ് യുവ താരം കാർത്തിയെ നായകനാക്കി സൂപ്പർ ഹിറ്റ് സംവിധായകൻ ലോകേഷ് കനകരാജ് സംവിധാനം ചെയ്ത ചിത്രമാണ് കൈതി. സൂപ്പർ മെഗാ ഹിറ്റായി മാറിയ ഈ ചിത്രം പിന്നീട് ലോകേഷിന്റെ തന്നെ വിക്രം കൂടി റിലീസ് ആയതോടെ ലോകേഷ് സിനിമാറ്റിക് യൂണിവേഴ്സിന്റെ കൂടെ ഭാഗമായി മാറി. ഇനി ഈ ചിത്രത്തിന്റെ രണ്ടാം ഭാഗം കൂടി വൈകാതെ തന്നെ പുറത്തു വരും. ലോകേഷ് ഇനി ചെയ്യാൻ പോകുന്ന ചിത്രം തീർത്തു കഴിഞ്ഞാൽ കൈതി 2 ആരംഭിക്കുമെന്നാണ് സൂചന. ഇപ്പോഴിതാ, കൈതി 2 വരുന്നതിനു മുൻപ് തന്നെ കൈതിയുടെ ഹിന്ദി റീമേക് എത്തുമെന്ന് ഉറപ്പായി കഴിഞ്ഞു. ബോളിവുഡ് സൂപ്പർ താരം അജയ് ദേവ്‌ഗൺ നായകനായി എത്തുന്ന കൈതി ഹിന്ദി റീമേക്കിന്റെ ടൈറ്റിൽ ഭോല എന്നാണ്. അടുത്ത വർഷം മാർച്ച് മുപ്പതിനാണ് ഭോല റിലീസ് ചെയ്യാൻ പോകുന്നത്.

നായകനായി അഭിനയിക്കുന്ന അജയ് ദേവ്‌ഗൺ തന്നെയാണ് ഈ ചിത്രം സംവിധാനം ചെയ്യാനും പോകുന്നതെന്നും പ്രഖ്യാപിച്ചിട്ടുണ്ട്. അജയ് ദേവ്‌ഗൺ സംവിധാനം ചെയ്യാൻ പോകുന്ന നാലാമത്തെ ചിത്രമായിരിക്കും കൈതി ഹിന്ദി റീമേക്കായ ഭോല. ഇപ്പോൾ ഹൈദരാബാദിൽ ഷൂട്ടിംഗ് പുരോഗമിക്കുന്ന ഈ ചിത്രത്തിൽ തബുവും പ്രധാന വേഷം ചെയ്യുന്നുണ്ടെന്നാണ് സൂചന. കാര്‍ത്തിക്ക് പുറമെ നരേന്‍, അര്‍ജുന്‍ ദാസ്, ഹരീഷ് ഉത്തമന്‍ എന്നിവരും പ്രധാന വേഷത്തിലെത്തിയ കൈതി 2019 ലാണ് റിലീസ് ചെയ്തത്. റണ്‍വേ 34ന് ശേഷം അജയ് ദേവ്ഗണ്‍ സംവിധാനം ചെയ്യുന്ന ചിത്രം കൂടിയാണ് കൈതി റീമേക്കായ ഭോല. റണ്‍വേ 34ന് മുൻപ് അദ്ദേഹം സംവിധാനം ചെയ്തത് യു മീ ഓർ ഹം, ശിവായ് എന്നീ ചിത്രങ്ങളാണ്.