എന്തിരന് ശേഷം വീണ്ടും രജനികാന്ത്- ഐശ്വര്യ റായ് കൂട്ടുകെട്ട്..?

ഇപ്പോൾ അഭിനയ രംഗത്ത് വീണ്ടും സജീവമാകുന്ന ബോളിവുഡ് താരസുന്ദരി ഐശ്വര്യ റായ് ഒരുപാട് വർഷത്തെ ഇടവേളയ്ക്കു ശേഷം അഭിനയിക്കുന്ന തമിഴ് ചിത്രമാണ് പൊന്നിയിൻ സെൽവൻ. മണി രത്‌നം ഒരുക്കുന്ന ഈ ചിത്രം രണ്ടു ഭാഗങ്ങൾ ആയാണ് റിലീസ് ചെയ്യുന്നത്. വമ്പൻ താരനിര അണിനിരക്കുന്ന ഈ ചിത്രത്തിലെ പ്രധാന നായികാ വേഷമാണ് ഐശ്വര്യ റായ് ചെയ്യുന്നത്. ഇപ്പോഴിതാ ഇതിനു ശേഷം ഒരു വമ്പൻ തമിഴ് ചിത്രം കൂടി ഐശ്വര്യ റായ് ചെയ്യാൻ പോവുകയാണ് എന്ന വാർത്തകൾ ആണ് വരുന്നത്. രജനീകാന്തിനെ നായകനാക്കി സംവിധായകൻ നെൽസൺ ദിലീപ് കുമാർ ഒരുക്കുന്ന സിനിമയിലും ഐശ്വര്യ റായ് ആണ് നായികയെന്ന റിപ്പോർട്ടുകൾ വരുന്നുണ്ട്. ഷങ്കർ സംവിധാനം ചെയ്ത എന്തിരൻ സിനിമയിൽ രജനിയുടെ നായികയായി ഐശ്വര്യ റായ് വേഷമിട്ടിരുന്നു.

വമ്പൻ ഹിറ്റായ ഈ ചിത്രത്തിന് ശേഷം ഈ കൂട്ടുകെട്ട് വീണ്ടും ഒന്നിക്കുമോ എന്നറിയാനുള്ള ആകാംക്ഷയിലാണ് ഇപ്പോൾ പ്രേക്ഷകർ. കോലമാവ് കോകില, ഡോക്ടർ എന്നീ ചിത്രങ്ങൾ ഒരുക്കിയ നെൽസൺ ആണ് ഇനി റിലീസ് ചെയ്യാൻ പോകുന്ന ദളപതി വിജയ് ചിത്രം ബീസ്റ്റും ഒരുക്കിയിരിക്കുന്നത്. ബീസ്റ്റ്‌ നിർമ്മിച്ച സൺ പിക്ചേഴ്സ് ആണ് ഈ വരുന്ന നെൽസൺ- രജനികാന്ത് ചിത്രവും നിർമ്മിക്കുന്നത്. നായികാ വേഷം ചെയ്യുന്ന കാര്യത്തിൽ ഐശ്വര്യ റായിയുമായി സിനിമയുടെ അണിയറ പ്രവർത്തകൾ ചർച്ച നടത്തുന്നുണ്ടെന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്. കോലമാവ് കോകില, ഡോക്ടർ, ബീസ്റ്റ്‌ എന്നീ മൂന്നു ചിത്രങ്ങൾക്കും സംഗീതമൊരുക്കിയ അനിരുദ്ധ് രവിചന്ദർ തന്നെയാണ് ഈ രജനികാന്ത് – നെൽസൺ ചിത്രത്തിനും സംഗീതം ഒരുക്കാൻ പോകുന്നത്.