മനം മയക്കുന്ന സൗന്ദര്യവുമായി ലോകസുന്ദരി വീണ്ടും; പൊന്നിയിൻ സെൽവനിലെ ഐശ്വര്യ റായ് കഥാപാത്രമിതാ

മണി രത്‌നം സംവിധാനം ചെയ്ത ബ്രഹ്മാണ്ഡ ചിത്രമായ പൊന്നിയിൻ സെൽവൻ ഇപ്പോഴതിന്റെ പോസ്റ്റ് പ്രൊഡക്ഷൻ സ്റ്റേജിലാണ്. രണ്ടു ഭാഗങ്ങളായി റിലീസ് ചെയ്യാൻ പോകുന്ന ഈ സ്വപ്ന ചിത്രത്തിന്റെ ആദ്യ ഭാഗം ഈ വർഷം സെപ്റ്റംബർ മുപ്പതിനാണ് റിലീസ് ചെയ്യാൻ പോകുന്നത്. ഇതിലെ ക്യാരക്ടർ പോസ്റ്ററുകൾ ഇപ്പോൾ ഓരോന്നായി റിലീസ് ചെയ്യുകയാണ്. ചിത്രത്തിലെ നായക വേഷങ്ങൾ ചെയ്യുന്ന ചിയാൻ വിക്രം, കാർത്തി എന്നിവരുടെ ക്യാരക്ടർ പോസ്റ്ററുകൾ കഴിഞ്ഞ ദിവസങ്ങളിൽ റിലീസ് ചെയ്തിരുന്നു. ആദിത്യ കരികാലനായി വിക്രമെത്തുമ്പോൾ വന്തിയാതേവനായി ആണ് കാർത്തി അഭിനയിച്ചിരിക്കുന്നത്. ഇപ്പോഴിതാ, ഇതിലെ നായികാ വേഷം ചെയ്യുന്ന ഐശ്വര്യ റായിയുടെ ക്യാരക്ടർ പോസ്റ്ററാണ് ഇന്ന് റിലീസ് ചെയ്തിരിക്കുന്നത്. നന്ദിനി എന്ന കഥാപാത്രമായി അഭിനയിച്ചിരിക്കുന്നു ഐശ്വര്യ റായിയുടെ മനോഹരമായ ഒരു ചിത്രമാണ് റിലീസ് ചെയ്തിരിക്കുന്നത്.

ഇവരെ കൂടാതെ ജയം രവി, തൃഷ, ഐശ്വര്യ ലക്ഷ്മി, ജയറാം, ലാൽ, ബാബു ആന്റണി, റിയാസ് ഖാന്‍, റഹ്മാന്‍, ശരത് കുമാർ, പാർത്ഥിപൻ, പ്രഭു, കിഷോർ, വിക്രം പ്രഭു, ശോഭിത, നിഴൽകൾ രവി, അർജുൻ ചിദംബരം, റഹ്മാൻ, മോഹൻ റാം എന്നിവരും ഈ ചിത്രത്തിൽ അഭിനയിച്ചിട്ടുണ്ട്. കൽക്കി കൃഷ്ണമൂർത്തി എഴുതിയ, പൊന്നിയിൻ സെൽവനെന്ന അഞ്ചു ഭാഗങ്ങൾ ഉള്ള ബ്രഹ്മാണ്ഡ നോവലിനെ അടിസ്ഥാമാക്കി, സംവിധായകൻ മണി ര്തനത്തോടൊപ്പം ചേർന്ന് ഇളങ്കോ കുമാരവേലാണ് ഈ ചിത്രത്തിന്റെ തിരക്കഥ രചിച്ചത്. അഞ്ഞൂറ് കോടി മുതൽ മുടക്കിൽ നിർമ്മിച്ചിരിക്കുന്ന ഈ ചിത്രം, ലൈക്ക പ്രൊഡക്ഷൻസ്, മണി രത്‌നത്തിന്റെ മദ്രാസ് ടാകീസ് എന്നിവർ ചേർന്നാണ് നിർമ്മിച്ചിരിക്കുന്നത്. സംഗീത മാന്ത്രികൻ എ ആർ റഹ്മാൻ സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിച്ചത് രവി വർമ്മൻ, എഡിറ്റ് ചെയ്യുന്നത് ശ്രീകർ പ്രസാദ് എന്നിവരാണ്.