വരത്തനിലെ വില്ലൻ ഇനിയൊരുക്കുന്നതു ചിരിയുടെ പൊടിപൂരം; ഷറഫുദീന്റെ കിടിലൻ കോമെടിയുമായി ജോണി ജോണി യെസ് അപ്പ എത്തുന്നു..!

ദൈവത്തിന്റെ സ്വന്തം ക്‌ളീറ്റസ്, അച്ഛാ ദിൻ, പാവാട എന്നീ ചിത്രങ്ങൾക്ക് ശേഷം മാർത്താണ്ഡൻ സംവിധാനം ചെയ്ത പുതിയ ചിത്രമാണ് ജോണി ജോണി യെസ് അപ്പ. കുഞ്ചാക്കോ ബോബൻ നായകനായി എത്തുന്ന ഈ ചിത്രം രചിച്ചിരിക്കുന്നത് വെള്ളിമൂങ്ങ എന്ന ബ്ലോക്ക്ബസ്റ്റർ ബിജു മേനോൻ ചിത്രം രചിച്ച ജോജി തോമസ് ആണ്. അടുത്ത മാസം റിലീസ് ചെയ്യാൻ പോകുന്ന ഈ ചിത്രത്തിന്റെ ട്രൈലെർ ഇന്ന് റിലീസ് ചെയ്തു. കുഞ്ചാക്കോ ബോബനൊപ്പം ഷറഫുദീൻ, വിജയ രാഘവൻ, മാസ്റ്റർ സനൂപ് സന്തോഷ് എന്നിവരും ഈ ചിത്രത്തിലെ പ്രധാന കഥാപാത്രങ്ങൾക്ക് ജീവൻ നൽകുന്നു.

ഇതിന്റെ ട്രൈലറിലൂടെ ഇപ്പോൾ ശ്രദ്ധാ കേന്ദ്രമായിരിക്കുന്നതു ഷറഫുദീൻ ആണ്. ഫഹദ് ഫാസിൽ- അമൽ നീരദ് ചിത്രമായ വരത്തനിലൂടെ വില്ലൻ വേഷവും തനിക്കു ചേരുമെന്ന് തെളിയിച്ച ഷറഫുദീൻ ജോണി ജോണി യെസ് അപ്പയിലൂടെ വീണ്ടും തന്റെ ചിരിക്കുപ്പായം എടുത്തണിയുകയാണ്.

ഈ ചിത്രത്തിന്റെ ട്രൈലെർ തന്നെ നമ്മളോട് പറയുന്നത് ഷറഫുദീൻ ഒരുക്കാൻ പോകുന്ന ഒരു ചിരിപ്പൂരം തന്നെ നമ്മുക്ക് കാണാൻ സാധിക്കുമെന്നാണ്. ട്രൈലറിൽ തന്നെയുള്ള രംഗങ്ങളിൽ ഷറഫുദീന്റെ കിടിലൻ കോമഡി ഉണ്ടെന്നത് തന്നെയാണ് ഈ ചിത്രത്തെക്കുറിച്ചു വലിയ പ്രതീക്ഷ പ്രേക്ഷകർക്ക് നൽകുന്നത്. ജീത്തു ജോസെഫ്- പ്രണവ് മോഹൻലാൽ ചിത്രമായ ആദിയിൽ ആണ് ഈ വർഷമാദ്യം ഒരു വ്യത്യസ്തമായ വേഷം ചെയ്തു ഷറഫുദീൻ പ്രേക്ഷകരുടെ കയ്യടി നേടിയത്. അതിനു പിന്നാലെ ഇപ്പോൾ വരത്തനിൽ ഈ നടൻ കാഴ്ച വെച്ചിരിക്കുന്നത് അസാമാന്യ പ്രകടനമാണ്. ഇപ്പോഴിതാ തന്റെ കോമഡി ട്രാക്കിലും തിരിച്ചെത്തി പ്രേക്ഷകരുടെ മനസ്സ് കവരാൻ ഒരുങ്ങുകയാണ് ഷറഫുദീൻ. പ്രേമം എന്ന അൽഫോൻസ് പുത്രൻ- നിവിൻ പോളി ചിത്രമാണ് ഷറഫുദീനെ മലയാളി പ്രേക്ഷകർക്കിടയിൽ പ്രിയങ്കരനാക്കിയത്.