ഷോലേക്കു ശേഷം ഇന്ത്യൻ സിനിമയിൽ ചരിത്രം സൃഷ്ടിക്കുന്ന ക്ലൈമാക്സുമായി ഒടിയൻ എത്തുന്നു..!

ഷോലെ എന്ന ചിത്രത്തിന് ഇന്ത്യൻ സിനിമയുടെ ചരിത്രത്തിൽ വളരെ വലിയ സ്ഥാനമാണ് ഉള്ളത്. ഈ ചിത്രത്തിന്റെ ഏറ്റവും വലിയ പ്രത്യേകത എന്തെന്നാൽ ഇതിന്റെ ക്ലൈമാക്സ് ആണ്. ഇന്ത്യൻ സിനിമയിലെ തന്നെ ഏറ്റവും നീളമേറിയ ക്ലൈമാക്സ് എന്ന റെക്കോർഡ് കൈവശമുള്ള സിനിമയാണ് ഷോലെ. ഏകദേശം അര മണിക്കൂറോളം ദൈർഘ്യമുള്ള ക്ലൈമാക്സ് ആക്ഷൻ സീക്വൻസ് ആണ് ഈ ചിത്രത്തിനുള്ളത്. ഷോലെ കഴിഞ്ഞാൽ ഇനി അത്തരമൊരു ക്ലൈമാക്സുമായി എത്തുന്ന ചിത്രമാണ് മോഹൻലാൽ നായകനായ ബ്രഹ്മാണ്ഡ മലയാള ചിത്രം ഒടിയൻ. ഏകദേശം 20 മുതൽ 25 മിനുറ്റ് വരെ നീണ്ടു നിൽക്കുന്ന ക്ലൈമാക്സ് സീക്വൻസ് ആണ് ഈ ചിത്രത്തിന്റെ ഹൈലൈറ്റ് എന്നാണ് അറിയുന്നത്.

മാജിക്കൽ റിയലിസം അല്ലെങ്കിൽ ഫാന്റസി ത്രില്ലർ എന്ന വിഭാഗത്തിൽ പെടുത്താവുന്ന ഒടിയന്റെ ക്ലൈമാക്സ് ഷൂട് ചെയ്തത് പൂർണ്ണമായും രാത്രിയിൽ ആണ്. ഈ ചിത്രത്തിലെ കൂടുതൽ രംഗങ്ങളും രാത്രി തന്നെയാണ് ചിത്രീകരിച്ചിരിക്കുന്നത്. ദേശീയ അവാർഡ് ജേതാവായ പീറ്റർ ഹെയ്ൻ ഒരുക്കിയ അഞ്ചു ഗംഭീര സംഘട്ടന രംഗങ്ങൾ ഉള്ള ഈ ചിത്രത്തിൽ എം ജയചന്ദ്രൻ ഈണം നൽകിയ അഞ്ചു മനോഹര ഗാനങ്ങളും ഉണ്ട്. വി ഹരികൃഷ്ണൻ തിരക്കഥ രചിച്ച ഈ ചിത്രം സംവിധാനം ചെയ്തത് വി എ ശ്രീകുമാർ മേനോനും വമ്പൻ ബഡ്ജറ്റിൽ ഈ ചിത്രം നിർമിച്ചിരിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്. മഞ്ജു വാര്യർ, പ്രകാശ് രാജ്, സിദ്ദിഖ്, മനോജ് ജോഷി,നരേൻ എന്നിവരും ഈ ചിത്രത്തിൻറെ ഭാഗമാണ്. വരുന്ന ഒക്ടോബർ മാസം പതിനൊന്നിന് മലയാളത്തിലെ ഏറ്റവും വലിയ റീലീസ് ആയി ഒടിയൻ പ്രദർശനത്തിന് എത്തും.