മോഹൻലാൽ, മമ്മൂട്ടി കഴിഞ്ഞാൽ ഫഹദ് ഫാസിൽ; വെളിപ്പെടുത്തി ഉർവശി

മലയാള സിനിമ കണ്ട എക്കാലത്തേയും ഏറ്റവും മികച്ച അഭിനേത്രി എന്ന് കരുതപ്പെടുന്ന നടിയാണ് ഉർവശി. മോഹൻലാൽ, മമ്മൂട്ടി എന്നിവർക്ക് ശേഷം അഭിനയത്തിന് 6 സംസ്ഥാന ചലച്ചിത്ര പുരസ്‍കാരം നേടുന്ന താരവും ഉർവശിയാണ്. കരിയറിൽ 700 ചിത്രങ്ങളാണ് ഉർവശി പിന്നിട്ടത്. ഇപ്പോഴിതാ അടുത്തിടെ നൽകിയ ഒരു മാധ്യമ അഭിമുഖത്തിൽ മലയാള സിനിമയുടെ പുതിയ തലമുറയെ കുറിച്ച് ഉർവശി പറഞ്ഞ വാക്കുകളാണ് ശ്രദ്ധ നേടുന്നത്. മോഹൻലാൽ, മമ്മൂട്ടി എന്നിവർ കഴിഞ്ഞാൽ മലയാളത്തിലെ ഏറ്റവും മികച്ച നടൻ ഫഹദ് ഫാസിൽ ആണെന്നാണ് ഉർവശി അഭിപ്രായപ്പെടുന്നത്.

ഇന്ത്യൻ സിനിമ വ്യവസായത്തിൽ വളരെയധികം സ്വാധീനം ഉണ്ടാക്കാൻ സാധിക്കുന്ന നടനാണ് ഫഹദ് ഫാസിൽ എന്നും കമൽ ഹാസൻ നായകനായ ചിത്രത്തിൽ മറ്റൊരു നടൻ ശ്രദ്ധിക്കപെടുക എന്ന അപൂർവതയാണ് വിക്രം എന്ന ചിത്രത്തിൽ ഫഹദ് അഭിനയിച്ചപ്പോൾ സംഭവിച്ചതെന്നും ഉർവശി പറയുന്നു. ഫഹദിന്റെ പ്രകടനം കൊണ്ട് കൂടിയാണ് ആ ചിത്രം ഓടിയതെന്നും ഉർവശി പറയുന്നു. ഫഹദ് ഇന്ത്യ മുഴുവൻ അറിയപ്പെടുന്ന ഒരു നടനായി മാറും എന്നതിൽ യാതൊരു സംശയവും ഇല്ലെന്നും അയാൾക്ക്‌ ഏത് കഥാപാത്രവും ചെയ്യാൻ സാധിക്കുമെന്നും ഉർവശി പറഞ്ഞു.