ലൂസിഫറിന് ശേഷം ബിഗ് ബ്രദറിലും വിനീത്; വിജയമാവർത്തിക്കാൻ മോഹൻലാൽ ചിത്രം

2019 ലെ ഏറ്റവും വലിയ വിജയമായി മാറിയ മലയാള ചിത്രം ആണ് മോഹൻലാൽ നായകനായ ലൂസിഫർ. യുവ സൂപ്പർ താരം പൃഥ്വിരാജ് സുകുമാരൻ സംവിധാനം ചെയ്ത ഈ ചിത്രം പുലിമുരുകന് ശേഷം നൂറു കോടി ക്ലബിൽ എത്തിയ രണ്ടാമത്തെ മലയാള ചിത്രമാണ്. ബോളിവുഡ് താരം വിവേക് ഒബ്‌റോയ് ആണ് ലുസിഫെറിലെ വില്ലൻ വേഷം ചെയ്തത്. അദ്ദേഹത്തിന് വേണ്ടി മലയാളത്തിൽ ഡബ്ബ് ചെയ്തത് പ്രശസ്ത നടനും നർത്തകനും ആയ വിനീത് ആണ്. വിവേക് ഒബ്‌റോയ്‌ക്ക്‌ വേണ്ടി അതിഗംഭീരമായി ഡബ്ബ് ചെയ്ത വിനീത് ലൂസിഫർ നേടിയ വിജയത്തിൽ വഹിച്ച പങ്കു ചെറുതല്ല. ഇപ്പോഴിതാ മോഹൻലാൽ നായകനായ സിദ്ദിഖ് ചിത്രമായ ബിഗ് ബ്രദറിലും തന്റെ ശബ്ദം കൊണ്ട് ഭാഗമായിരിക്കുകയാണ് വിനീത്.

ഈ ചിത്രത്തിലൂടെ മലയാളത്തിൽ അരങ്ങേറ്റം കുറിക്കുന്ന ബോളിവുഡ് താരം അർബാസ് ഖാന് വേണ്ടി ശബ്ദം നൽകിയിരിക്കുന്നത് വിനീത് ആണ്. കഴിഞ്ഞ ദിവസം റിലീസ് ആയ ബിഗ് ബ്രദറിന്റെ ട്രൈലെർ സോഷ്യൽ മീഡിയയിൽ വമ്പൻ ഹിറ്റായി മാറിയിരിക്കുകയാണ്. അതിൽ അർബാസ് ഖാന്റെ ഡയലോഗുകൾ വിനീതിന്റെ ശബ്ദത്തിൽ അതിഗംഭീരമായാണ് വന്നിരിക്കുന്നത്. വേദാന്തം ഐ പി എസ് എന്ന കഥാപാത്രം ആയാണ് അർബാസ്‌ ഖാൻ ഈ ചിത്രത്തിൽ അഭിനയിക്കുന്നത്. ലൂസിഫർ നേടിയ വിജയം ബിഗ് ബ്രദറും ആവർത്തിച്ചാൽ വിനീത് എന്ന നടന്റെ ശബ്ദം മലയാളത്തിലെ ഭാഗ്യങ്ങളിൽ ഒന്നായി മാറും എന്നത് തീർച്ചയാണ്. മികച്ച നടൻ എന്ന് പേരെടുത്തിട്ടുള്ള വിനീത് സൗത്ത് ഇന്ത്യയിലെ തന്നെ ഏറ്റവും മികച്ച നർത്തകന്മാരിൽ ഒരാൾ കൂടിയാണ്. മോഹൻലാലുമായി വളരെ അടുത്ത സൗഹൃദം പുലർത്തുന്ന വ്യക്തി കൂടിയാണ് വിനീത്.