ഗോദയ്ക്ക് ശേഷം പ്രിഥ്വിരാജ് ചിത്രം നയനിലൂടെ ഗംഭീര തിരിച്ചു വരവിന് ഒരുങ്ങി വാമിക ഗബ്ബി…

ആരാധകർ ഏറെ കാത്തിരിക്കുന്ന പ്രിഥ്വിരാജ് ചിത്രമാണ് നയൻ. സംവിധായകൻ കമലിന്റെ മകൻ ജീനസ് മുഹമ്മദ് ചിത്രം സംവിധാനം ചെയ്യുന്നു. 100 ഡേയ്സ് ഓഫ് ലവ് എന്ന ചിത്രത്തിലൂടെ സംവിധാന രംഗത്തേക്ക് കാൽവെപ്പ് നടത്തിയ സംവിധായകനാണ് ജീനസ്. എന്നാൽ ഇത്തവണ നയനിലൂടെ ഏറെ വ്യത്യസ്തമായൊരു കഥയുമായാണ് ജീനസ് എത്തുന്നത്. മലയാളികൾക്ക് അധികം പരിചിതമില്ലാത്ത സയൻസ് ഫിക്ഷൻ വിഭാഗത്തിൽ പെടുന്ന ചിത്രമാണ് നയൻ. ചിത്രത്തിനായി മലയാളത്തിൽ ഇന്നേവരെ കാണാത്ത സാങ്കേതിക വിദ്യയാണ് ഉപയോഗിച്ചിരിക്കുന്നത്. ഇന്ത്യയിലെ തന്നെ ആദ്യ ജമിനി 5 കെ ക്യാമറയിൽ ഷൂട്ട് ചെയ്യുന്ന ചിത്രമായിരിക്കും നയൻ. അഭിനന്ദൻ രാമാനുജനാണ് ചിത്രത്തിന് ഛായാഗ്രഹണം ഒരുക്കുന്നത്. ചിത്രത്തിന്റെ പോസ്റ്ററാണ് കഴിഞ്ഞ ദിവസം പുറത്ത് വന്നിരിക്കുന്നത്.

ഗോദ എന്ന ഒറ്റ ചിത്രത്തിലൂടെ തന്നെ മലയാളികളുടെ മനം കവർന്ന വാമിക ഗബ്ബി തിരിച്ചെത്തുന്നു എന്ന പ്രത്യേകത കൂടിയുള്ള ചിത്രമാണ് നയൻ. ചിത്രത്തിൽ പ്രിഥ്വിരാജിന്റെ നായികയായി എത്തുന്ന വാമികയുടെ പോസ്റ്ററാണ് ഇപ്പോൾ പുറത്ത് വന്നിരിക്കുന്നത്. ചിത്രത്തിൽ വാമിക ഗബ്ബി ഇവ എന്ന കഥാപാത്രമായാണ് എത്തുന്നത്. ചിത്രത്തിന്റെ പോസ്റ്റർ ഇതിനോടകം തന്നെ ശ്രദ്ധിക്കപ്പെട്ടു കഴിഞ്ഞു എന്ന് തന്നെ പറയാം. ചിത്രത്തിന്റെ മോഷൻ പോസ്റ്റർ ഏതാനും ദിവസങ്ങൾക്ക് മുൻപ് പുറത്ത് വന്നു തരംഗം സൃഷ്ടിച്ചിരുന്നു. ഏറെ വ്യത്യസ്തമായ മോഷൻ പോസ്റ്ററായിരുന്നു അന്ന് എത്തിയത്. ഓഗസ്റ്റ് സിനിമാസ്സിൽ നിന്നും വിട്ട് പ്രിഥ്വിരാജ് സ്വന്തമായി നിർമ്മിക്കുന്ന ചിത്രമെന്ന പ്രത്യേകത കൂടി നയനിനുണ്ട്. ചിത്രത്തിൽ പ്രിഥ്വിരാജിനോടൊപ്പം ആഗോളതലത്തിൽ ശ്രദ്ധേയരായ നിർമ്മാതാക്കൾ സോണി പിക്ചേഴ്സും പങ്കാളികളാണ്. ഹിമാലയത്തിൽ ഉൾപ്പടെയുള്ള വമ്പൻ ചിത്രീകരണത്തിന് ശേഷം ചിത്രം ഈ വർഷം അവസാനത്തോടെ തീയേറ്ററുകളിൽ എത്തും.