അഡ്വാൻസ് ബുക്കിംഗ് ആരംഭിച്ച് ഒരു തെക്കൻ തല്ല് കേസ്; ലഭിക്കുന്നത് മികച്ച പ്രേക്ഷക പ്രതികരണം

മലയാളികളുടെ പ്രിയ താരവും ദേശീയ അവാർഡ് ജേതാവുമായ ബിജു മേനോൻ നായകനായി എത്തുന്ന ഏറ്റവും പുതിയ ചിത്രമായ ഒരു തെക്കൻ തല്ല് കേസ് വരുന്ന സെപ്റ്റംബർ എട്ടിന് ഓണം റിലീസായി എത്തുകയാണ്. പ്രശസ്ത രചയിതാവ് ജി.ആർ. ഇന്ദുഗോപൻ രചിച്ച അമ്മിണിപ്പിള്ള വെട്ടുകേസ് എന്ന പുസ്തകത്തെ അധികരിച്ചു കൊണ്ട് രാജേഷ് പിന്നാടൻ തിരക്കഥ രചിച്ച ഈ ചിത്രം സംവിധാനം ചെയ്തിരിക്കുന്നത് നവാഗതനായ ശ്രീജിത്ത് എൻ ആണ്. മോഹൻലാലിനെ നായകനാക്കി പൃഥ്വിരാജ് ഒരുക്കിയ ബ്രോ ഡാഡി എന്ന സൂപ്പർഹിറ്റ് ചിത്രത്തിന്റെ തിരക്കഥ രചയിതാക്കളിൽ ഒരാൾ കൂടിയായിരുന്നു ശ്രീജിത്ത്. ഏതായാലും ഇപ്പോൾ മലയാളി പ്രേക്ഷകർ ഏറെ കാത്തിരിക്കുന്ന ഒരു തെക്കൻ തല്ല് കേസിന്റെ അഡ്വാൻസ് ബുക്കിംഗ് കേരളത്തിൽ ആരംഭിച്ചു കഴിഞ്ഞു. ഇന്നലെ മുതൽ ബുക്കിംഗ് ആരംഭിച്ച ഈ ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നത്. പല സെന്ററുകളിലും മികച്ച അഡ്വാൻസ് ബുക്കിങ്ങാണ് ഈ ചിത്രത്തിന് ലഭിച്ചു കൊണ്ടിരിക്കുന്നത്.

ഗംഭീര ഓപ്പണിങ് ആയിരിക്കും ഈ ചിത്രം നേടുകയെന്നുള്ള സൂചനയാണ് ഈ അഡ്വാൻസ് ബുക്കിംഗ് സ്റ്റാറ്റസ് നമ്മളോട് പറയുന്നത്. അമ്മിണി എന്ന് വിളിപ്പേരുള്ള അമ്മിണിപ്പിള്ളയെന്ന കഥാപാത്രമായി ബിജു മേനോനെത്തുന്ന ഒരു തെക്കൻ തല്ല് കേസിന്റെ ടീസർ, ട്രൈലെർ, ഇതിലെ ഗാനങ്ങൾ എന്നിവ ഇപ്പോൾ തന്നെ സൂപ്പർ ഹിറ്റാണ്. ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും, ന്യൂ സൂര്യ ഫിലിംസിന്റെ ബാനറിൽ സുനിൽ എ കെയും ചേർന്ന് നിർമ്മിച്ച ഈ ചിത്രം ഇവിടെ വിതരണം ചെയ്യാൻ പോകുന്നതും ന്യൂ സൂര്യ ഫിലിംസാണ്, ബിജു മേനോനെ കൂടാതെ റോഷൻ മാത്യു, നിമിഷ സജയൻ, പത്മപ്രിയ, അഖിൽ കവലയൂർ, അശ്വത് ലാൽ, റിജു ശിവദാസ്, അരുൺ പാവുമ്പ, അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്യുതാന്ദൻ, ശശി വാളൂരാൻ, നീരജ രാജേന്ദ്രൻ, ജയരാജ് എന്നിവരും പ്രധാന വേഷങ്ങൾ ചെയ്യുന്ന ഈ ചിത്രത്തിന് സംഗീതമൊരുക്കിയത് ജസ്റ്റിൻ വർഗീസ്, ക്യാമറ ചലിപ്പിച്ചത് മധു നീലകണ്ഠൻ, എഡിറ്റ് ചെയ്തത് മനോജ് കണ്ണോത് എന്നിവരാണ്.