അസ്‌കർ അലിയുടെ പുതിയ ചിത്രത്തില്‍ അദിതി രവിയും…

ഈ വർഷം പുറത്തിറങ്ങിയ ഹണി ബീ 2.5 എന്ന ചിത്രത്തിലൂടെയാണ് യുവ താരം ആസിഫ് അലിയുടെ അനുജൻ ആയ അസ്‌കർ അലി മലയാള സിനിമയിൽ നായകനായി അരങ്ങേറിയത്. ആദ്യ ചിത്രത്തിലൂടെ തന്നെ ഒരു അഭിനേതാവ് എന്ന നിലയിൽ ശ്രദ്ധിക്കപ്പെട്ട അസ്കറിന് ഇപ്പോൾ കൈ നിറയെ അവസരങ്ങൾ ആണ്. ബിനു എസ് സംവിധനം ചെയ്ത കാമുകി എന്ന ചിത്രം പൂർത്തിയാക്കിയ അസ്കറിന്റേതായി വരുന്ന മറ്റൊരു പുതിയ ചിത്രമാണ് ചെമ്പരത്തി പൂവ്. ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തിറങ്ങി എന്ന് മാത്രമല്ല മികച്ച പ്രേക്ഷക ശ്രദ്ധയും നേടുന്നുണ്ട്. നവാഗതനായ അരുൺ വൈഗ സംവിധാനം ചെയ്യുന്ന ഈ ചിത്രം നിർമ്മിക്കുന്നത് ഡ്രീം സ്ക്രീൻസിന്റെ ബാനറിൽ ഭുവനേന്ദ്രൻ, സക്കറിയ എന്നിവരാണ്. അലമാര എന്ന ചിത്രത്തിലൂടെ പ്രേക്ഷക പ്രശംസ പിടിച്ചു പറ്റിയ അദിതി രവി ഈ ചിത്രത്തില്‍ ഒരു പ്രധാന വേഷത്തില്‍ എത്തുന്നു എന്നതുമൊരു പ്രത്യേകതയാണ്.

സന്തോഷ് അനിമ ഛായാഗ്രഹണം നിർവഹിക്കുന്ന ഈ ചിത്രത്തിന് രാകേഷ് എ ആർ ആണ് ഗാനങ്ങളും, പശ്ചാത്തല സംഗീതവും ഒരുക്കിയിരിക്കുന്നത്. സംവിധായകൻ ആയ അരുൺ വൈഗ തന്നെ എഡിറ്റിംഗ് നിർവഹിക്കുന്ന ചെമ്പരത്തി പൂവ് എന്ന ചിത്രത്തിന്റെ പോസ്റ്ററിലെ ക്യാപ്‌ഷനും ശ്രദ്ധ നേടുന്നുണ്ട്. ചങ്കു പറിച്ചു കയ്യിൽ കൊടുത്തപ്പോൾ എന്നാണ് ഫസ്റ്റ് ലുക്ക് പോസ്റ്ററിലെ ക്യാപ്ഷൻ. ഒരു പ്രണയ ചിത്രമായി ഒരുങ്ങുന്ന ചെമ്പരത്തി പൂവ് ഒരു കമ്പ്ലീറ്റ് എന്റെർറ്റൈനെർ തന്നെ ആയിരിക്കും എന്നാണ് റിപ്പോർട്ടുകൾ സൂചിപ്പിക്കുന്നത്. നോബിൾ ജേക്കബ് ആണ് ചിത്രത്തിന്റെ പ്രൊജക്റ്റ് ഡിസൈനർ.