പൃഥ്വിരാജ് ചിത്രം ആദം ജോൺ എസ്ര പോലെ ഒരു ഹൊറർ മൂവി ആണോ..? സംവിധായകൻ പറയുന്നു..!

ഈ വരുന്ന ഓണത്തിന് പൃഥ്വിരാജ് തന്റെ ആരാധകർക്കായി ഒരുക്കുന്ന സമ്മാനമാണ് ആദം ജോൺ. ഓണത്തിന് വമ്പൻ റീലിസിനൊരുങ്ങുന്ന ഈ ചിത്രം സംവിധാനം ചെയ്തിരിക്കുന്നത് ജിനു എബ്രഹാം ആണ്. ജോണി ആന്റണി സംവിധാനം ചെയ്ത മാസ്റ്റേഴ്സ്, അനിൽ സി മേനോൻ സംവിധാനം ചെയ്ത ലണ്ടൻ ബ്രിഡ്ജ് എന്നീ പ്രിത്വി രാജ് ചിത്രങ്ങൾക്ക് തിരക്കഥയൊരുക്കിയ ജിനു എബ്രഹാം ആദ്യമായി സംവിധാനം ചെയ്ത ചിത്രമാണ് ആദം ജോൺ. ചിത്രത്തിന്റെ ആദ്യ ടീസർ ഇതിനോടകം പുറത്തിറങ്ങുകയും വമ്പൻ സ്വീകരണം നേടുകയും ചെയ്തു. ഹോളിവുഡ് സിനിമകളെ അനുസ്മരിപ്പിക്കുന്ന ദൃശ്യങ്ങളാണ് ഈ ടീസറിന്റെ പ്രത്യേകത എന്നതിനൊപ്പം ചില സംശയങ്ങളും ഇതിലെ ദൃശ്യങ്ങൾ പ്രേക്ഷകർക്ക് നൽകി. ടീസറിലെ ദൃശ്യങ്ങളും പശ്ചാത്തല സംഗീതവും ഒരു ഹൊറർ മൂഡ് ആണ് പ്രേക്ഷകരിൽ ഭൂരിഭാഗം പേർക്കും നൽകിയത് എന്നതിൽ സംശയമില്ല.

അപ്പോൾ ആദം ജോണും ഇസ്ര പോലെ ഒരു ഹൊറർ ത്രില്ലർ ആണോ എന്നതാണ് പ്രേക്ഷകരുടെ ഇപ്പോഴത്തെ സംശയം. ചിത്രത്തിന്റെ സംവിധായകൻ തന്നെ അതിനു മറുപടി പറയുകയാണ്.

ആദം ജോൺ എന്ന സിനിമയ്ക്കു ഹൊറർ ആയി യാതൊരു ബന്ധവുമില്ല എന്നാണ് ജിനു പറയുന്നത്. ആദം ജോൺ കുടുംബ ബന്ധങ്ങളുടെ കഥ പറയുന്ന, വൈകാരികമായ ഘടകങ്ങൾ അടങ്ങിയ ഒരു ത്രില്ലർ ആണ്. ഒരു ഫാമിലി ത്രില്ലർ എന്നോ റിവഞ്ച് ത്രില്ലർ എന്നോ ഉള്ള ഗണത്തിലൊക്കെ വേണമെങ്കിൽ പെടുത്താവുന്ന ഒരു ചിത്രമാണ് ആദം ജോൺ എന്നാണ് റിപ്പോർട്ടുകൾ ആദ്യമേ വന്നത്. ഭാവന നായികയാവുന്ന ഈ ചിത്രത്തിൽ പ്രശസ്ത നടൻ നരെയ്‌നും പ്രധാന വേഷത്തിൽ എത്തുന്നുണ്ട്.

മിഷ്‌ടി ചക്രവർത്തി, രാഹുൽ മാധവ്, ലെന എന്നിവരും ഈ ചിത്രത്തിൽ പ്രധാനപ്പെട്ട വേഷങ്ങൾ ചെയ്യുന്നു. സ്കോട്ട്ലാൻഡിൽ ആണ് ഈ ചിത്രത്തിന്റെ ഭൂരിഭാഗവും ചിത്രീകരിച്ചിട്ടുള്ളത്. കേരളത്തിന്റെ ഹൈറേഞ്ച് മേഖലകളിലും ഈ ചിത്രം ഷൂട്ട് ചെയ്തിട്ടുണ്ട്. സെപ്റ്റംബർ ആദ്യ വാരം ആദം ജോൺ തീയേറ്ററുകളിൽ എത്തും.