ധ്യാനിന്റെ അഭിമുഖ തമാശകൾ കേട്ട് ചിരിക്കുന്ന ശ്രീനിവാസൻ; പുത്തൻ തിരക്കഥയുമായി ശ്രീനിവാസൻ തിരിച്ചു വരുന്നു; വൈറലായി നടിയുടെ കുറിപ്പ്

മലയാളികളുടെ പ്രീയപ്പെട്ട നടനും രചയിതാവും സംവിധായകനുമാണ് ശ്രീനിവാസൻ. ഒട്ടേറെ ചിത്രങ്ങളിലൂടെ പ്രേക്ഷകരെ രസിപ്പിച്ച അദ്ദേഹത്തിന്റെ മക്കളായ വിനീത് ശ്രീനിവാസനും ധ്യാൻ ശ്രീനിവാസനും ഇന്ന് മലയാളത്തിലെ അറിയപ്പെടുന്ന നടന്മാരും സംവിധായകരുമാണ്. കഴിഞ്ഞ കുറച്ചു കാലമായി ആരോഗ്യ പ്രശ്നങ്ങൾ മൂലം സിനിമയിൽ നിന്ന് വിട്ടു നിൽക്കുകയാണ് ശ്രീനിവാസൻ. വളരെ മോശമായ അവസ്ഥയിൽ നിന്നാണ് ശ്രീനിവാസൻ ജീവിതത്തിലേക്ക് മടങ്ങി വന്നത്. ഈ അടുത്തിടെ നടന്ന മഴവിൽ അവാർഡ് ഷോയിൽ പങ്കെടുത്ത ശ്രീനിവാസന് സ്റ്റേജിൽ വെച്ച് മുത്തം നൽകിയ മോഹൻലാലിന്റെ ചിത്രം സോഷ്യൽ മീഡിയയിൽ വൈറലായി മാറുകയും ചെയ്തിരുന്നു. അതുപോലെ തന്നെ മോഹൻലാൽ നായകനായ ഒരു ചിത്രം ശ്രീനിവാസന്റെ രചനയിൽ സംവിധാനം ചെയ്യാനുള്ള പ്ലാനിലാണ് താനെന്ന് സത്യൻ അന്തിക്കാടും വെളിപ്പെടുത്തിയിരുന്നു. ഇപ്പോഴിതാ ശ്രീനിവാസനെ സന്ദർശിക്കാൻ പോയ നടി സ്മിനു സിജോയുടെ ഫേസ്ബുക് കുറിപ്പാണു വൈറലാവുന്നത്.

തന്റെ ഫേസ്ബുക് അക്കൗണ്ടിൽ സ്മിനു സിജോ കുറിച്ചത് ഇങ്ങനെ, “ഈ സന്തോഷം എന്നും മായാതിരിക്കട്ടെ. ശ്രീനിയേട്ടന്റെ തിരിച്ചുവരവിനായി പ്രാർത്ഥിച്ച എല്ലാവർക്കും സന്തോഷിക്കാനും കൂടിയാണ് ഈ ഫോട്ടോ ഇവിടെ പോസ്റ്റ് ചെയ്യുന്നത്. ചെറിയ ചില ആരോഗ്യപ്രശ്നങ്ങൾ ഒഴിച്ചാൽ ശ്രീനിയേട്ടൻ ഇന്ന് പൂർണ്ണ ആരോഗ്യവാനാണ്. ഇന്ന് ഞാൻ ശ്രീനിയേട്ടൻ്റെ വീട്ടിൽ പോയി. സന്തോഷത്തോടെ എന്നെ കെട്ടിപിടിച്ച് സ്വീകരിച്ച വിമലാൻ്റിയും ,കണ്ട ഉടന്നെ വിശേഷങ്ങൾ ചോദിച്ചറിഞ്ഞ ശ്രീനിയേട്ടനും, ധ്യാൻൻ്റെ ഇൻറ്റർവ്യൂ തമാശകൾ പറയുമ്പോൾ മതി മറന്നു ചിരിക്കുന്ന സ്നേഹനിധികളായ മാതാപിക്കളുടെ സന്തോഷവും. ധ്യാൻ ഇൻറ്റർവ്യൂവിൽ പറയാൻ മറന്നതൊ അതൊ അടുത്ത ഇൻറ്റർവ്യുവിൽ പറയാൻ മാറ്റിവച്ചതൊ, അറിയില്ല, എന്തായാലും പഴയ നർമ്മത്തിന് ഒട്ടും മങ്ങൽ ഏൽപിക്കാതെ ധ്യാൻമോൻ്റെ ചെറുപ്പകാലത്തെ തമാശകളും ഇടയ്ക്ക് മാത്രം കാണിക്കുന്ന പക്വതകളും അഭിമാനത്തോടെ പറഞ്ഞു ചിരിക്കുന്ന ശ്രീനിയേട്ടനെയും, ശ്രീനിയേട്ടൻ്റെയും മക്കളുടെയും നിഴലായി മാത്രം ജീവിക്കുന്ന വിമലാൻ്റിയുടെയും കൂടെ ചിലവഴിക്കാൻ പറ്റിയ നിമിഷങ്ങൾ എൻ്റെ ഏറ്റവും വല്യ അഭിമാന നിമിഷങ്ങളാണ്. പൂർണ്ണ ആരോഗ്യവാനായി എഴുതാൻ പോവുന്ന, അടുത്ത മനസ്സിലുള്ള തിരകഥയെ പറ്റി വാതോരാതെ സംസാരിച്ച ശ്രീനിയേട്ടൻ. ആ കണ്ണുകളിലെ തിളക്കം അത്മവിശ്വാസം അതു മാത്രം മതി നമ്മൾ മലയാളികൾക്ക്, നമ്മുടെ പ്രിയപ്പെട്ട ശ്രീനിയേട്ടൻ്റെ തിരിച്ചു വരവിന്”.