സ്ത്രീ കഥാപാത്രത്തിന് രൂപമില്ല, ശബ്ദം മാത്രം; മമ്മൂട്ടിയുടെ മതിലുകൾക്കു ശേഷം മോഹൻലാലിന്റെ എലോൺ

മലയാളത്തിന്റെ മഹാനടൻ മോഹൻലാൽ നായകനായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് എലോൺ. ഷാജി കൈലാസ് സംവിധാനം ചെയ്ത ഈ ചിത്രം രചിച്ചിരിക്കുന്നത് രാജേഷ് ജയരാമനാണ്. കോവിഡ് പശ്‌ചാത്തലത്തിൽ കഥ പറയുന്ന ഈ ചിത്രം പൂർണ്ണമായും ഒരു ഫ്ലാറ്റിലാണ് ചിത്രീകരിച്ചിരിക്കുന്നത്. മാത്രമല്ല, മോഹൻലാൽ മാത്രമാണ് ഇതിൽ അഭിനയിച്ചിരിക്കുന്നത്. വളരെ അപൂർവമായി മാത്രമേ ഒരാൾ മാത്രം അഭിനയിക്കുന്ന ചിത്രങ്ങൾ ഇന്ത്യൻ സിനിമയിൽ തന്നെ സംഭവിച്ചിട്ടുള്ളൂ. ഒറ്റിറ്റി റിലീസ് ആയാവും ഈ ചിത്രം റിലീസ് ചെയ്യുക എന്നും രണ്ടു മണിക്കൂർ അഞ്ച് മിനിട്ടാണ് ഇതിന്റെ ദൈർഘ്യമെന്നും സംവിധായകൻ ഷാജി കൈലാസ് ഈ അടുത്തിടെ പറഞ്ഞിരുന്നു. ഇപ്പോഴിതാ ഈ ചിത്രത്തെ കുറിച്ച് പറയുന്നത് പ്രശസ്ത നടിയും ഡബ്ബിങ് ആർട്ടിസ്റ്റുമായ സീനത്താണ്. താൻ ഈ ചിത്രത്തിന് വേണ്ടി ഡബ്ബ് ചെയ്ത കാര്യമാണ് സീനത് പറയുന്നത്.

മോഹൻലാൽ മാത്രമാണ് ഇതിൽ അഭിനയിച്ചിരിക്കുന്നതെങ്കിലും, ഇതിലെ ഒരു സ്ത്രീ കഥാപാത്രത്തിന്റെ ശബ്ദമായി താനുമുണ്ടെന്നും സീനത് പറയുന്നു. ഇതിനു മുൻപ് അത്തരത്തിൽ ശ്രദ്ധ നേടിയത് ഒരുപാട് വർഷങ്ങൾക്കു മുൻപ് നടി കെ പി എ സി ലളിതയാണ്. മമ്മൂട്ടിയെ നായകനാക്കി, 1990 ഇൽ അടൂർ ഗോപാലകൃഷ്ണൻ സംവിധാനം ചെയ്ത മതിലുകൾ എന്ന ചിത്രത്തിൽ ശബ്ദം കൊണ്ട് മാത്രമാണ് കെ പി എ സി ലളിതയുടെ സാന്നിധ്യമുള്ളതു. വലിയ കയ്യടിയാണ് അതിൽ ഡബ്ബ് മാത്രം ചെയ്ത് കൊണ്ട് കെ പി എ സി ലളിത നേടിയെടുത്തത്. കഴിഞ്ഞ വർഷം നടൻ ജയസൂര്യയെ നായകനാക്കി രഞ്ജിത് ശങ്കർ സംവിധാനം ചെയ്ത സണ്ണി എന്ന ചിത്രവും ഒരു കഥാപാത്രത്തെ മാത്രം ഫോക്കസ് ചെയ്തു കൊണ്ടാണ് ഒരുക്കിയത്.