സേതുലക്ഷ്മിയമ്മയുടെ മകന് വൃക്ക നല്കാൻ പൊന്നമ്മ ബാബു; നടിക്ക് സോഷ്യൽ മീഡിയയുടെ കയ്യടി..!

പ്രശസ്ത നടി സേതുലക്ഷ്മിയമ്മ രണ്ടു മൂന്നു ദിവസം മുൻപാണ് ഒരു വീഡിയോയുമായി സോഷ്യൽ മീഡിയയുടെ ശ്രദ്ധ നേടിയത്. രണ്ടു വൃക്കയും തകരാറിലായി മരണം മുന്നിൽ കണ്ടു കിടക്കുന്ന തന്റെ മകനെ സഹായിക്കാൻ തനിക്കു സാധിക്കുന്നില്ല എന്നും അതിനു വേണ്ടിയുള്ള സഹായം സുമനസ്സുകൾ ചെയ്യണമെന്നുമാണ് സേതുലക്ഷ്മിയമ്മ ആ വീഡിയോയിലൂടെ നിറകണ്ണുകളുമായി അഭ്യർത്ഥിച്ചത്. ആ വീഡിയോ കണ്ടു ആദ്യം മുന്നോട്ടു വന്നത് പ്രശസ്ത നിർമ്മാതാവായ നൗഷാദ് ആലത്തൂർ ആയിരുന്നു. അദ്ദേഹം സേതുലക്ഷ്മിയമ്മക്ക് 25000 രൂപ ധന സഹായവും താൻ നിർമ്മിക്കുന്ന പുതിയ ചിത്രത്തിൽ വേഷവും നൽകി. ഇപ്പോഴിതാ സേതുലക്ഷിയമ്മയുടെ മകന് തന്റെ ഒരു വൃക്ക നല്കാൻ തയ്യാറാണ് എന്ന് പറഞ്ഞു മുന്നോട്ടു വന്നിരിക്കുകയാണ് പ്രശസ്ത നടി പൊന്നമ്മ ബാബു.

വനിതാ മാഗസിന് നൽകിയ അഭിമുഖത്തിലാണ് പൊന്നമ്മ ബാബു ഇക്കാര്യം വെളിപ്പെടുത്തിയത്. സേതുലക്ഷ്മി അമ്മയുടെ മകൻ കിഷോറിന് തന്റെ കിഡ്‌നി നൽകും എന്നുള്ള കാര്യം പൊന്നമ്മ ബാബു സേതുലക്ഷ്മിയമ്മയെ നേരിട്ട് വിളിച്ചു അറിയിക്കുകയും ചെയ്തു. കിഡ്‌നി നല്കാൻ ആരെങ്കിലും തയ്യാറുണ്ടെങ്കിൽ 25 ലക്ഷം രൂപയാണ് ഹോസ്പിറ്റൽ ചെലവ് വരിക. വീഡിയോ കണ്ട ഒരുപാട് പേര് സാമ്പത്തിക സഹായവുമായി എത്തുന്നുണ്ട്. മൂന്നു പേര് കിഡ്നി നൽകാം എന്നും പറഞ്ഞിട്ടുണ്ട് എന്ന് സേതുലക്ഷ്മി പറയുന്നു.

താൻ ചെയ്യുന്ന കാര്യത്തെ വലിയൊരു ഔദാര്യമെന്നോ സന്മനസോ എന്ന് പറഞ്ഞ് വലുതാക്കരുതേ എന്നും വാർത്തയാക്കാൻമാത്രം എന്തോ മഹാകാര്യം ചെയ്യുന്നുവെന്ന ഭാവവും തനിക്കില്ല എന്നും പൊന്നമ്മ ബാബു പറയുന്നു. സേതുലക്ഷ്മി ചേച്ചി തനിക്കു കൂടെപ്പിറപ്പിനെ പോലെ ആണെന്നും ആ ചേച്ചിയുടെ കണ്ണീരു കണ്ടു നിക്കാൻ കഴിയില്ല എന്നും പൊന്നമ്മ ബാബു പറഞ്ഞു. കാശ് വാരി എറിയാൻ ഒന്നും തന്റെ കയ്യിൽ ഇല്ല എന്നത് കൊണ്ട് തനിക്കു ചെയ്യാൻ കഴിയുന്ന സഹായം ഇത് മാത്രമാണെന്നും പൊന്നമ്മ ബാബു പറഞ്ഞു.