തെരുവിൽ അലഞ്ഞു തിരിയുന്നവരെ കുളിപ്പിച്ചും അവർക്ക് ഭക്ഷണവും വസ്ത്രവും നൽകിയും നടൻ വിനു മോഹനും ഭാര്യയും

കോവിഡ്‌ 19 ഭീതിയിൽ രാജ്യം മുഴുവൻ അടച്ചിട്ടു പ്രതിരോധ പ്രവർത്തനങ്ങൾ നടക്കുമ്പോൾ ദുരിതത്തിലായ ഒരുപാട് ആളുകളുണ്ട്. മോഹൻലാലും, മമ്മൂട്ടിയും ഉൾപ്പെടെയുള്ള മലയാള സിനിമാ താരങ്ങൾ കോവിഡ് 19 പ്രതിരോധ പ്രവർത്തനങ്ങളിൽ തങ്ങളാലാവുന്ന വിധം സജീവമാണ്. സ്വന്തമായി വീടില്ലാതെ, തെരുവിൽ അലഞ്ഞു തിരിയുന്ന ഒരുപാടാളുകൾ വലിയ പ്രതിസന്ധിയാണ് ഈ സമയത്തു നേരിടുന്നത്. ഇപ്പോഴിതാ അവർക്ക് സഹായവുമായി എത്തിയിരിക്കുകയാണ് നടൻ വിനു മോഹനും ഭാര്യയും. കോട്ടയത്തെ തെരുവുകളിൽ അലഞ്ഞു തിരിഞ്ഞു നടന്നവരെ കുളിപ്പിച്ചും അവർക്ക് ഭക്ഷണവും വസ്ത്രവും നൽകുകയും ചെയ്തിരിക്കുകയാണ് വിനു മോഹനും ഭാര്യ വിദ്യയും. തെരുവിൽ അലഞ്ഞു തിരിയുന്നവരെ സഹായിക്കുന്ന തെരുവോരം പ്രവർത്തകരുടെ സഹായത്തോടെയാണ് വിനു മോഹനും ഭാര്യയും ഈ പ്രവർത്തനത്തിന് മുന്നിട്ടിറങ്ങിയത്. ഒട്ടേറെ മലയാള ചിത്രങ്ങളിലൂടെ മലയാള സിനിമാ പ്രേക്ഷകരുടെയിടയിൽ സുപരിചിതനാണ് വിനു മോഹൻ.

നടി ശോഭാ മോഹന്റെ മകനായ വിനു മോഹന്റെ അമ്മാവനാണ് പ്രശസ്ത നടൻ സായ് കുമാർ. വിനു മോഹന്റെ അനുജൻ അനു മോഹനും പ്രേക്ഷകർക്ക് സുപരിചിതനായ നടനാണ്. ഈ വർഷമിറങ്ങിയ അയ്യപ്പനും കോശിയും എന്ന സച്ചി ചിത്രത്തിലെ പൊലീസുകാരനായി അനു മോഹൻ നടത്തിയ പ്രകടനം ഏറെ കയ്യടി നേടിയിരുന്നു. അന്തരിച്ചു പോയ ഇതിഹാസ തുല്യനായ രചയിതാവും സംവിധായകനുമായ ലോഹിതദാസ് ആണ് നിവേദ്യം എന്ന തന്റെ ചിത്രത്തിലെ നായകനായി വിനു മോഹനെ പ്രേക്ഷകർക്ക് പരിചയപ്പെടുത്തിയത്. അതിനു ശേഷം ഒട്ടേറെ ചിത്രങ്ങളിൽ നായകനായും സഹനടനായുമെല്ലാം ഈ യുവ താരമഭിനയിച്ചു. മോഹൻലാൽ നായകനായി എത്തിയ മലയാളത്തിലെ ഇപ്പോഴത്തെ ഇൻഡസ്ട്രി ഹിറ്റ് ചിത്രമായ പുലി മുരുകനിൽ മോഹൻലാലിന്റെ അനുജനായി അഭിനയിച്ച വിനു വലിയ പ്രേക്ഷക പ്രശംസ നേടിയിരുന്നു.